Shillong 5 tarik , : Ka Sorkar Meghalaya Democratic Alliance (MDA) ka la noh syniang da ka song pisa kaba T.10,000 sha ki nongdie madan (street vendors), kum shi bynta ban kyntiew ïa ka ioh ka kot jong ki bad ban iarap ïa ki ha ka imlang sahlang.
Katei ka jingnoh syniang ka Sorkar jylla la leit sam da u ar ngut ki myntri kiba kynthup ia u Myntri ka tnad Urban Affairs, u Bah Sniawbhalang Dhar bad u Bah Paul Lyngdoh ka tnat Arts & Culture bad Tourism.
Ia katei ka prokram lyngkot la pynlong ha Iew Khyndai Lad ha kaba u Symbud Myntri Rangbah haba ai kren ba kane ka jingnoh syniang ka dei lyngba ka skhim kaba kyrpang jong ka sorkar jylla, kaba la tip kum ka “Chief Minister’s Relief for Street Vendors”. La ai ïa kane ka jingïarap hadien ba la lap ba bun ki nongdie madan ha ki shnong bad ki nongbah ki shem jingeh ban bteng ïa ka kam ka jam jong ki na ka daw ka jingkiew dor, jingbym biang ki jaka die, bad kiwei pat ki jingeh.
U Bah Dhar u la kyntu ruh ïa ki nongdie madan ba kin pyndonkam hok ïa ka pisa, khnang ban kyntiew shuh shuh ïa ka imlang sahlang bad ban long ki nongialam ha ka ioh ka kot ka jylla.
Ka Sorkar MDA ka dang iai pynpaw ïa ka jingkitkhlieh na ka bynta ki riewlum riewtrai bad ki bym lah ban ioh lad ban kiew shaphrang, da kaba ai jingkyrshan ha baroh ki liang.
U la ai khublei kyrpang ïa ki nongdie madan (street vendors) kiba la ioh jingiarap na ka bynta ka jingïasam pisa lyngba ka tnad MUDA (Meghalaya Urban Development Authority).
Na ka liang u Bah Paul u la pynpaw ba ka jingnoh syniang pisa da ka T.10,000 ka long kum ka dak jong ka jingithuh ïa ka jingtrei shitom jong ki nongdie madan kiba im da ka kam die kam thied ha ki lynti syngkien. U la ong ruh ba kane ka jingïarap ka dei ka sienjam kaba long ruh kum ka jingsngewthuh bad ka jingïarap jong ka sorkar jylla sha kito kiba shem jingeh ha ka rukom kamai kajih ha ki jaka sor.
“Kum ki nongdie madan, phi long ki riew paidbah kiba lah ban kyntiew ïa ka ioh ka kot jong ka jylla. Kane ka jingïarap ka long tang ka jingplie lynti, hynrei ka thong ka long ban pynurlong ïa ki sap ne bor kamai jong phi,” la ong u Bah Paul ha ka jingïalang kaba la pynlong ha Shillong.
U la ai khublei ruh ïa ka MUDA bad ka tnad Urban Affairs halor ka jingtrei shitom ban pynurlong ïa kane ka skhim, bad u la kyntu ïa baroh kiba la ioh ka jingiarap ba kin pyndonkam hok ïa ka pisa na ka bynta ka bha ka miat jong ki bad ki longïing longsem jong ki.