Shillong, 15 Nailar 2025 – Ha ka jingrakhe nyngkong ka sngi riewlum jong ka Ri India ha Polo Ground, Shillong, u Myntri Rangbah ka Jylla Meghalaya u Conrad K. Sangma u la ban jur halor ka jingtrei shitom ka sorkar MDA hapoh ka jingialam jong u ban kyntiew ia ka roi ka par bad ka bha ka miat jong u paidbah ka jylla.
U la pynshai ba ka sorkar ka la buh ia ka thong lyngba ka “Meghalayan Decade” (2022–2032) ban pynlong ia ka Meghalaya kum kawei na ki Top 10 jylla ha ka Ri India ha ka liang GDP per capita bad ki Sustainable Development Goals. U la pyni ruh ia ka Mission 10 kum ki 10 jingkular na ka bynta ki paidbah, kiba kynthup ia ka surok kaba biang, um bam, bording, jingsumar, pule puthi, jingiarap ha ka imlang sahlang, internet, jingai jingshakri sha ka iing ka sem bad jingpynskhem ia ki jaka paidbah.
U Myntri Rangbah u la pynkynmaw ruh ia ka jingkiew shaphrang ka jylla ha ki snem ba la leit: ka jingioh um bam mynta ka la kot sha ka 80 % ki iing, ka surok 2,500 km ba la dep shna, ka jingkhein khlad ki longkmie ha ka por kha ba la hiar haduh 47 %, ka jingkhein khlad ki khynnah rit ba la hiar haduh 30 %, ka jingpynkhlain ia ki health sub-centres, bad ka jingtei ia ki Medical College ha Shillong bad Tura.
U la shim ruh ka sienjam ban kular ban kyntiew ia ka ioh ka kot ka jylla haduh $10 billion ha u snem 2028 bad $16 billion ha u snem 2032, bad ban wanrah ia ka jingshna pisa haduh Rs. 10,000 klur. Ka thong ba kham jylliew ka long ban pynlong ia ka Meghalaya kum ka “Viksit Meghalaya” kaba don ka ioh ka kot haduh $100 billion ha u snem 2047, ban iaid ryngkat bad ka thong ka Ri India Viksit Bharat.