Ka Mamata Banerjee ryngkat U Dr.Mukul Sangma, Bah Charles Pyngrope
Shillong, Nohprah 13 : Na ka bynta ka elekshon sha ka Iingdorbar Thaw Ain ka Jylla Meghalaya jong u snem 2023 ka seng All India Trinamool Congress (AITC) kam lah ban tuklar ka shong ha ka Meghalaya TMC iathuh ka Chairperson ka All India Trinamool Congress (AITC) Mamata Banerjee ha Nongbah Shillong ha ka jingiakynduh sha ki lad pathai khubor myn ha 13 tarik u Nohprah. Ka Mamata Banerjee ka la ong ba ka seng kan sa pynbna ia ka kyrtong Myntri Rangbah hadien bala pynbna ka Election Commission ia ka elekshon ha Meghalaya. Haba kylli na ka liang ki lad pathai khubor ia ka Mamata Banerjee iano yn jied ban long Myntri Rangbah, katei ka Nongïalam ka la kyntait ban iathuh hynrei ka shu antad hi lah ban dei mano ban dei u kyrtong Myntri Rangbah napdeng ki arngut ki Nongialam-Dr Mukul Sangma ne u Bah Charles Pyngrope. Ka Mamata Banerjee ka iathuh ba ka seng kan sa pyntip shen. Ai ba ka jingpynbna iaka elekshon ban mih shuwa. U Dr Mukul u dei u Myntri Rangbah barim bad ngi kmen shisha ia ka jingtreikam jong u. U Bah Charles ruh u don bad ngi kmen bha-ta ka daw phi lah ban iaantad mano ban dei” ong ka Mamata haba iakren bad ki nongthoh khubor. Shuh shuh ka Mamata kala ong ba ki nongialam ka Party kin ym tuklar ia ka rai jong ka State Party, kaba la dep rai ban pynmih kyrtong na baroh 60 tylli ki Constituency.“Lada don kiwei ki party kiba kwah iasoh ne don ka jingiatreilang, ka rai kan shong ha ka party ha Jylla bad ngim don jingpyrshah satia ia ka” kala ong.Ka Banerjee kala pyntip ruh ba ka AITC kala pynkhreh ban chargesheet ia ka Sorkar MDA ba ialam da ka NPP ha ka Jylla.