Shillong, Jylliew 3: Haduh 27 ngut ki nongtrei jong ka Khasi Hills Autonomous District Council (KHADC) ki la dawa na ka Executive Committee (EC) ba la lamkhmat da ka Voice of the People Party (VPP) ban weng noh ïa ka rai ïa ka jingpynlong nongtrei regular, bad ban shah ha ki ban bteng tang kum ki casual worker.
Kane ka jingdawa ka mih hadien ba ka jingpynbna na u Secretary jong ka EC ka la mih ha ka 30 tarik Jymmang, kaba ong ba ka jingpynrung kam regular ïa ki la pynduh noh naduh ka 1 tarik Jylliew, namar ba ka pynlong lait na ki kyndon aiñ. Hynrei la ong ba ka kam casual kan dang bteng.
Kitei nongtrei ba shah ktah mar mar ki la leit ban ïakynduh ïa u Chief Executive Member u bah S. Rynjah ba kim lah ban pdiang ia ka rai jong ka EC kaba lamkhmat da ka VPP . Ki ong ruh ba ki la trei kum ki nongtrei casual palat 6-7 snem ha ki tnat bapher bapher kum ka enforcement bad ki la shah pynlong regular da ka EC kaba rim kaba la lamkhmat da ka National People’s Party (NPP) ha u snem 2023-2024.
“Ym ju don ha kano kano ka jaka ba la regular noh bad pat pynpoi biang sha ka casual,” ong ki nongtrei sha ki nongthoh khubor hadien ka jingialang bad u CEM.
Ki la pynpaw ruh, “Ym dei tang ba shim rai, hynrei ki dei ban khot shwa ban ïa kren bad ngi. Lada ka Council ka shem jingeh ha ka pisa, ngi kloi ban sngewthuh. Hynrei ka rai kam dei ban long kaba pynshong nongrim tang ha ka jingpynkylla EC. Ka EC kaba rim ruh ka la shem jingeh ha ka pisa hynrei kam ju pynpaw kum kane. Balei kane ka EC kaba thymmai ka shu pynduh kam noh da kaba ong ba ka don ka jingduna pisa?”
Ki la dawa ruh, “Ngi kwah ba u CEM un weng noh mardor ïa kane ka rai. Lada u don ka policy thymmai, to u pyndep ha kaba wan, ym dei ban pynkylla noh ïa ka jong ka la dep.”
Ki la kdew ruh, “La tip paidbah ba bun ki nongtrei ha KHADC kim shym la shah thung lyngba ka interview lane exam. Te lada ka EC ka kwah ban pynduh, ka dei ban leh ïa baroh, ym dei ban jied tang katto katne.”
Haba kylli, ki nongtrei ki ong ba kin sa bishar lada kin leit sha ïingbishar ban wad ïa ka jingbishar halor kane ka kam.
Uwei na ki constable ha ka enforcement, u Khrawbor Mawlong, u la ïathuh ba u CEM um shym la ai ka jubab kaba biang hynrei u shu ong ba ka EC kam lah shuh ban pynsaisnoh ïa ka rai jong ka.