Shillong 6 Nailar 2025 — Ka sur u paidbah na ka thain South West Khasi Hills, khamtam na ki shnong ba hap hapoh ka surok Welloi sha Keniong, ka la wan shakhmat ban ïakynduh bad ïatai bad u Myntri Rangbah ka jylla Meghalaya, u Conrad K. Sangma, halor ka jingbym shym la pyntrei ïa katei ka surok kaba ki paidbah la angnud la slem.
Na ka liang u Chairman ka Sur u Paidbah ka Thaiñ South West Khasi hills district u Bah Kitboklang Nongrem ryngkat lang u MLA ka Ranikor u bah Pius Marweiñ, u Bah Renikton L. Tongkhar ki son ban pynsngew paidbah na ka bynta ki jingmyntoi u paidbah ki ar tylli ki district kum ka West Khasi hills bad ka South West khasi hills district.
U bah Nongrem u la ong ki paidbah Mawkyrwat, ki nongshnong na ki shnong ba pher ba pher kum ka Keniong, Welloi, Rangblang, Nongmalieh bad kiwei de, ki la wan ban pynsngew ïa ka jingsngewkhia bad jingbym ïoh jingtrei na katei ka surok ba pyniasoh ïa ki shnong sha ki jaka pynmih jingtei bad ka surok bah.
U nongïalam jong ka kynhun paidbah u la ong ba katei ka surok ka long kaba donkam tam namar ka dei ka lynti ba pyniasoh ïa ki paidbah sha ka sor Mawkyrwat bad ruh sha ki Hospital, jaka pule bad ki iew. U la pynpaw ruh ba ka jingshah ieh beiñ jong ka surok Welloi-Keniong ka la pynkharbang shikatdei ïa ka roi ka par ha katei ka thain.
Kitei ki nongmihkhmat paidbah kum u bah Pius Marweiñ bad u bah Renikton L. Tongkhar ki iathuh
u Myntri Rangbah Conrad K. Sangma u la pdiang ïa ka jingdawa jong ki paidbah, u la kular ba ka Sorkar jylla kan shimkhia halor kane ka jingeh. U la ong ba un sa bthah ïa ka tnad PWD (Roads) ban tohkit bad ban shim khia ban pyndep noh ïa katei ka surok hapoh ka por kaba biang.
U la bynrap ruh ba ka Sorkar Meghalaya ka la buh hakhmat ha ka thong jong ka ban pynroi ïa ki thain ba kyndong bad ka roi ka par hapoh South West Khasi Hills ka dei kaba kongsan ha kane ka juh ka thong.
Ki paidbah ki la pdiang sngewbha ïa ka jingleit ïakynduh u Myntri Rangbah bad ki la kyrmen ba shen kin ïohi ïa ka jingtreikam kaba shisha ha katei ka surok kaba ki la angnud la bun bun snem.