Ka Mawlai Town Dorbar (MTD) kaba dei ka synjuk jong ki 17 tylli ki Dorbar Shnong kala shim ïa ka rai ba kan nym shah shuh ïa u Vice Chancellor ka NEHU u Prof PS Shukla, ban ïuhkjat ha u pud u sam jong ka Mawlai baroh kawei.

Ka MTD ka la shim ïa katei ka rai hadien ka jingwan ïakynduh ïa ki samla kiba ïashimbynta ha ka jingïakhih da kaba shah thngan, ban dawa pynhiar shuki noh mardor ïa u Prof PS Shukla kum u VC lem bad kiwei pat ki heh jong ka skulbah NEHU.

Ka MTD hapoh ka jingïalam u President Bah Herlambok War, Bah Sorbar Lyngdoh Nongpyiur Vice president, Dr Marco Mitri, Secretary, Bah Lumsyntiew Lyngdoh, Asst.secretary, Bah Kim Khongkliam, Treasurer ryngkat lang bad baroh ki Rangbah Shnong jong ki 17 Dorbar ka la pynbna ban ym shah shuh ïa u Prof PS Shukla ban ïuhkjat ha ka shnong Mawlai, ka long kum ka dak ban ai ka jingkyrshan kaba pura ïa kane ka jingïakhih ki samla pule hapoh ka jingïalam ka NEHUNSA bad NEHU KSU Unit.
Ka MTD ka la pynpaw ruh ïa ka jingsngewkhia halor ka jinglong jong ka koit ka khiah jong ki samla pule kiba la shong shah thngan bad kala ai jingmut ruh ba kin shim noh da kiwei ki lad ki lynti ban bteng ka jingkhih ka jong ki.