Shillong – Ka shnong Kharang bad ki dong ki thaiñ ka Mawkynrew ha ki snem mynshuwa duh ki dei kiba dang duna ha ka shlem jingstad tad ha u 1950 terter haduh u snem 1973 la ngam ka jingstad lyngba ki skul.
Ka Annie Margaret Barr kaba dei Nong Bilat ne England ka la wan sha Ri Khasi ban sam ia ka jingstad.
Ia ka Annie Margaret Barr ba la ju tip bad khot ki Khasi kum ka Kong Barr bad la kha ïa ka ha u snem 1899 ha England bad khlad pat ha New Delhi ha u snem 1973.
Ka SHnong Kharang myn ha ka 24 tarik u Risaw ka la kynmaw burom ia ka jingdap 50 snem jong ka jingkhlad ka Kong Barr da jingpynhap pyrda da ka jinglehkmen da ka Skul bad ka Balang Unitarian lem ka School Managing Committee ka Annie Margaret Barr HS School ha phyllaw katei ka skul.
Ha kane ka sngi la ïa donlang da u Bah Banteidor Lyngdoh, MLA ka Mawkynrew kum u kongsan, u Bah Martle N Mukhim, MDC ka Mawkynrew kum u Symbud Kongsan, u Bah Marki Passah, President Unitarian Union, u Bah Nangroi Suting, , ka Dr Kate R Walker, kaba wan mih khmat na ka First Unitarian Church, Pittsburgh, USA , u Dr Khlur Mukhim, u Bah Banjop Mukhim nalor u Bah Wanpher Muttyent, Chairman lem kiwei pat.
Katei ka kong Barr ka la wan shong wan sah ha Ri Khasi kum ha Kharang ka long ka nongwanrah jingkylla kaba jar jar na ka jingdum sha ka jingshai da ki kam ba bha bad u synñiang jong ka ha ka pule puthi, ka koit ka khiah, ka jingïarap ïa ki khun swet nalor kiwei pat kaba ki paidbah Nongkharang ki iapur khana ia katei ka BRIEW.
Ka Kong Barr ka Poi nyngkong ha Ri Khasi ha u snem 1934 bad ha u snem 1940 ka la kylla long ka Lecturer jong ka Subject English ha Lady Keane’s College bad ha u snem 1941 ka la shah khot ha ka Sorkar ban hikai bad long Headmistress ha Government High School ha Jowai.
Ka Kong Annie Barr kaba la ïohi ba ki jaka sor kim don ïa ki lad ban ai jinghikai ryngkat ka jingpule bad jingtreikam bad bun ki khynnah haba ki la pule ha ki jaka sor kim leit phai shuh sha la ki shnong nongkyndong.
Kumta ka la ïakren bad ki bor pynïaid ka Balang bad ha u snem 1949 ka la sdang ïa ka Kharang Rural Centre ban ai jingsumar, ki jinghikai ïa ki briew katei ka thaiñ.
Ha ki snem 1960 ka la sdang ïa ka jaka ri khunswet ha ka jaka sah jong ka bad hikai ïa ki ban pule ban thoh. Hadien kane na ka jinglong tymmen bad jingbym don ha ka met ba koit ba khiah ka la ïakren bad ki bor shnong ban plie ïa ka skul ha u snem 1968 ban pynïaid da kiba ïa don bynta bad kane ka skul ka ïeng mynta ha ka kyrteng ka Annie Margaret Barr Higher Secondary School ha katei ka shnong.
Ka Kong Barr ka la khlad noh ha ka 11 tarik u Nailar, 1973 ha New Delhi ha ka por ba ka leit shah sumar bad la thang ïa ka ha katei ka nongbah bad la wanrah ïa u dpei ha Kharang bad buh ïa u ha u motdur jong ka.
Ka Kong Annie ka la pyndep MA na Cambridge University hadien ba ka la pyndep jinghikai ha ka Unitarian Ministry ka la kylla long ka Myntri ha ka Unitarian Church of Our Father ha Rotherham, United Kingdom.
Ka dei ha ka por ba ka don ha ka jinghikai ba ka la tip shaphang ka India lyngba ka Friend of India Society, ka daw jingïakhih ban ïoh laitluid na ki British nangta shaphang u Babu Hajom Kissor Sing Nongbri (u nongseng ïa ka Balang Khasi Unitarian ha ka por ba ka Meghalaya ka dang hap ha ka Jylla Assam) bad kumjuh shaphang u Mahatma Gandhi bad ka la leit ïakynduh ruh ïa ki.
