Shillong, 14 Nailar 2025 – U Myntri Rangbah ka Jylla Meghalaya, u Conrad K. Sangma, mynta ka sngi u la pyllait paidbah ia ka bynta kaba nyngkong jong ka jingïarap pisa hapoh ka skhim FOCUS+, ha kaba palat 93,000 ngut ki nongioh jingmyntoi ki ioh T. 2,500 ngut man u briew, kaba kot baroh sha ka T. 23.25 klur, kum ka tranche kaba nyngkong jong ka snem pisa 2023–24. Kane ka dei ka jingkyntiew kaba kongsan ban kyntiew ia ka ioh ka kot jong ki longïing nongkyndong bad ban pynkhlaiñ ia ka jingrep bad ka thied ka tem ha ka jylla.
La plie paidbah ia ka FOCUS+ ha u bnai Naitung 2022 kum ka jingpynheh ia ka skhim FOCUS (Farmers’ Collectivisation for Upscaling Production and Marketing Systems). Haduh mynta, ka skhim ka la iarap sha palat 1.5 lak ngut ki nongrep bad la dep pyllait pisa haduh T. 75.3 klur ban kyntiew ia ki kam rep bad ki kam ba iadei bad ka rep. Ka jingthmu jong ka skhim ka long ban kyrshan ia ki longïing nongkyndong ban shim bynta ha ki kam bapher bapher ban pynkhlaiñ ia ka jingmih mar rep bad ban kyntiew ia ka ioh ka kot ha ki shnong.
Haba kren ha ka jingialang, u Conrad u ong, “Mynta ka sngi ka dei ka sngi sah kynmaw ia ka Jylla Meghalaya. Palat 10,000 ngut ki briew na 52 tylli ki C&RD Block ha kylleng ka jylla ki la ia don lang lyngba ka technology. Ka thong ban tei ia ka $10 billion economy haduh u snem 2028 kam dei tang da ki surok, ki ophis, ne ki jaka ialehkai, hynrei dei ban iashong iakhih lang man ka shnong, man ka block bad man ka district.”
U Myntri Rangbah u la kdew ruh ia ka jingwanrah ka sorkar ia ka Chief Minister Urban Livelihood Grant (CM ULG), kaba ai jingïarap pisa lyngba ka Direct Benefit Transfer sha ki nongdie ha ïew bad ki nongtrei kam rit riew ha ka sor, kaba shong nongrim na ka jingwan jngoh ia ka ïew Iewduh.
U ong ruh, “Ngim banse ban pynhap ïa ka jingïarap kaba kyrpang na ka bynta ki nongrep ban pynbeit ïa ki jingeh rit hynrei kiba ktah bha ia ka jingtrei ha ka sngi ka sngi. Kane ka dei ka daw ba ngi la seng ia ka skhim FOCUS+.”
U la pynbna ba ki nongioh jingmyntoi kiba la ioh mynta kin sa ioh noh shen ia ka bynta kaba dang sah bad kyrpad ia ki nongrep ba kin pyndonkam hok ia kane ka jingïarap. U kyntu ruh ia baroh ban register ha ka MeghalayaOne Portal (https://meghalayaone.gov.in) ban ioh jingmyntoi na kiwei ki skhim ka sorkar.
Ha ka jingïathuh khana, u Bah Batskhem Nongrum na Mawkynrew, uba dei u dkhot ka Dohlang Producer Group, u la pynpaw ka jingnguh ha ka sorkar jylla halor kane ka lad. U Bah Khrawkupar Kharbani na Tynronglem Producer Group, Nongstoin, u la ong ba kane ka jingïarap ka la pynlah ia u ban thied symbai bad pynkhlaiñ ia ka kam rep jong u, bad pynskhem ia ka jingim ka iing ka sem. U la kdew ruh ia ka jingdonkam ban tei ki lad tih um na ka bynta ban pyniaid ka kam rep ha ka por lyiur bad por tlang.
Ka sorkar ka la buh thong ban pyllait T. 5,000 klur sha ki nongrep ha ki 10 snem ban sa wan, bad man ka snem kan buh T. 500 klur na ka bynta kane ka kam pynroi. Ki nongioh jingmyntoi kin ioh ka FOCUS+ card kum ka jingithuh bad ka jingpyllait pisa ka long ha ki bynta, ha kaba mynta ka dei ka bynta kaba nyngkong.