‘Ai ba ki shipai kin wan’: Ki lehnoh JeM ki kyntait ia ka jingkyrpad jong ka kmie ban aiti noh shwa ban shah pyniap.

Kane ka jingiakren ka la jia lyngba ka video call tang khyndiat por shwa ba u Amir Nazir Wani un shah pyniap ha ka jingiakynduh ha Pulwama .
Ka video clip ka la mih kaba pyni ïa ka jingïakren hapdeng u lehnoh jong ka Jaish-e-Mohammed (JeM) u Amir Nazir Wani bad ka kmie jong u, ha kaba ka kmie jong u ka la kyrpad ïa u ban pyndem noh ha ki bor pahara.
Kane ka jingïakren ka la jia lyngba ka video call tang khyndiat por shwa ba u Wani un shah pynïap ha ka jingïakynad ha Pulwama district jong ka Jammu bad Kashmir ha ka sngi Thohdieng.
Ha katei ka clip, kaba la paw bha ha ki social media naduh katei ka por, la iohi ia u Wani, ba u bat ia ka suloi AK-47, katba u dang ia kren bad ka kmie jongu. Ka la long ka jingiakren kaba khatduh jong ki.
“Sngewbha aiti noh,” lah ban iohsngew ia ka kmie jong u ba ka kyrpad, hynrei u Wani u la kyntait, da kaba jubab, “To ai ba ki shipai kin wan shakhmat, nangta ngan sa peit.”
Ia katei ka video call la leh na katei ka iing kaba u Wani u rieh tngen shwa ban khie katei ka jingiasiat. Hajan ka kmie jong u, ka para jong u Wani ruh ka la kren ia u.
Ha katei ka jingkhot, u la ioh ban iakren ruh bad ka para jong uwei pat u lehnoh, U Asif Ahmed Sheikh, uba la shah pyniap ruh ha katei ka juh ka jingiakynduh.
Lai ngut ki lehnoh JeM ki la iap ha ka jingiakynad kaba la jia ha ki thain Nader, Tral ha Pulwama hynne ka step. Ki bor pahara ki la leh katkum ki jingtip ba la lum jingtip shaphang ka jingdon jong ki lehnoh ha katei ka jaka.
Kitei ki lehnoh, ki dei kiba la tip kyrteng kum u Asif Ahmed Sheikh, u Amir Nazir Wani, bad u Yawar Ahmed Bhat – baroh ki dei kiba don jingiadei bad ka kynhun lehnoh kaba don ha Pakistan, ka Jaish-e-Mohammed, ong ka khubor.