Shillong, 26 Naiwieng 2025 : Ha ka jingïalang Kabinet kaba la long mynta ka sngi ha ka jingïalam u Myntri Rangbah ka jylla, u Conrad K. Sangma, ka Sorkar Meghalaya ka la shim shibun ki rai kiba kongsan kiba iadei bad ka roi ka par, ka jingpynkhlaiñ ïa ki skhim sorkar bad ka jingkyrbuit ban kyntiew ïa ka kam jngohkai pyrthei ha ka jylla.
- T. 500 klur na ka Sorkar India ban kynthup ïa ki shnong bad ïing kiba lait noh
U CM u pynbna ba kiwei ki bynta jong ka jylla ki la shah lait noh na ka thup census 2011. Ha ka jingpan jong ka jylla ha u 2022, ka Sorkar India ka la pdiang ban kynthup biang ïa ki shnong bad ki ïing kiba lait noh ha ki skhim bapher bapher.
Ka Sorkar Pdeng ka la ai sanction haduh T. 500 klur ban pyndap ïa ka thup kaba thymmai
- Kabinet ai jingmynjur ban thied jaka na ka bynta ka jingpynheh ïa ka Shillong Airport
Ka Sorkar ka la mynjur ban thied jaka kaba dei ban ïoh pyndonlang bad ka jaka Defense ha Umroi, na ka bynta ka jingpynheh ïa ka Shillong Airport ban pdiang ïa ki liengsuin kiba kham heh.
La bthah ïa u Deputy Chief Minister (Transport) ban bteng ban ïakren bad ki heh shnong bad ki paidbah ka thain.
- Ka jingbuh kyndon kyrpang halor ka charge weng utility
Ka Kabinet ka la mynjur ban buh rate shongkut 2.5% kum ka charge ba kin shim ki agency haba weng utility kum ki electricity line, pipe, cable bad kiwei ha ki projek surok.
Kane ka long ban pynbeit bad pynshai ïa ki jinglut jingsep kiba la iaid lait ha ki snem bala leit.
- Sorkar thmu thied jaka shuh na ka bynta ki projek jngohkai pyrthei ha Mawkynrew bad Umden
Ka Sorkar ka la ong ba ki jaka sorkar kiba don ha Tura, Sohra bad Shillong kiba la pyndonkam na ka bynta PPP hotel/resort projects ki la pynkut.
Ha kaba bud, ka Kabinet ka la rai ban thied jaka shuh ha ki jaka kiba don ka lad jingsdang kaba khambha: Laitlum Canyon, Mawkynrew, Smit bad
Umden Silk Village, Ri-Bhoi
Kine ki jaka ki long kiba bna bad kiba shna jingkyrmen ban tei resort bad hotel kyrdan ha ka PPP Model, ban pynkiew ïa ka jngohkai pyrthei ha Meghalaya.
- T. 50 klur ban tei surok Nongpoh–Umden
Ka Kabinet ka la ai sanction T. 50 klur ban tei surok sha Umden, ka thain kaba paw namar ka kam Ryndia (Eri Silk). Kane kan pynsuk ïa ka leit ka wan bad kan iarap ruh ban kyntiew ïa ka kam jngohkai pyrthei ha katei ka jaka.