Shillong 19 Jymmang Ki bor pynïaid District East Khasi Hills District mynta ka sngi ki la sdang ïa ka Pre-recruitment coaching cum training na ka bynta ki Agniveer Candidates (Indian Army) ha ka KJP Synod Girls Hr Secondary School Mawkhar. Kane ka prokram ai jinghikai kaba 45 sngi ka thmu ban ai jingmut ïa ki kyrtong Agniveer ban ïaleh ïa ki eksamin ba ju long ha u bnai jylliew ba kut lane ha ka 1 tarik u bnai Naitung 2025.
Ia ka jingialang plie la pynlong da u bah C.V. D Diengdoh, IAS , Commissoner , Secretary, GAD bad la iadonlang ruh ka kong R M Kurbah, Deputy Commissioner IAS, Col Vinay Kumar, Director Army Recruitment Office, S. Warjri, MCS Additional DC bad Lt Col (Retd) Ophis S Weinikarlf, Zila.
Haba ai jingkren sha ki kandidiet kiba kwah ban ioh kam , u Cyril Diengdoh u la pynpaw ïa ka jingkordor ban rung sha ka tnat shipai India ym tang kum ka lad kamai hynrei kum ka lad ïa ki samla ban long kiba don akor, kiba don burom bad kiba don burom.
U la pynshlur ïa ki samla ba kin wan sha katei ka coaching bad training man ka por khnang ba kin lah ban pyndep ïa baroh ar tylli ki Common Entrance Exam bad Physical fitness test.
U Col Vinay Kumar u la batai lyngkot ïa ki nongaplai kam shipai shaphang u Agniveer kum ka jingjied ïa ka kam bad u la ïasam ruh ïa ki jingai jingmut kiba kordor shaphang ki kyndon jingjied, ka syllabus, ka rukom thungkam, ki jingmyntoi bad kiwei kiwei.
Ka kong R M Kurbah, Deputy Commissioner ka la kdew ba ka jingai jinghikai khlem jingsiew (free coaching cum training) ka dei ka rukom treikam kaba ryntih da ki bor synshar District ban pynbiang ïa ki kyrtong ïa ka jingstad bad jingtbit ba donkam ban pyndep ïa ki Entrance exam bad ka physical test. Ka la kyntu ia ki kyrtong ba kin long kiba minot ban leit sha ki coaching class bad ki jinghikai khnang ba baroh kin ioh ban long shi bynta jong ka kynhun shipai India ha kawei ka sngi. Kito kiba pyndep ia ki eksamin Entrance ba la thoh yn ai jinghikai kaba jur ia ka met kaba 30’sngi kumjuh.