Ai jingiarap ka sorkar Meghalaya sha ka Nazareth Hospital Shillong ban kyntiew ia ka koit ka khiah

Shillong, Naitung 7: Haba bteng ia ka polisi jong ka sorkar jylla ban kyrshan pisa ia ki hospital bym donkam kamai jong ka jylla ha ka jingthmu ban kyntiew ia ka jingsumar ia ki paidbah khamtam ia kiba duk bad kiba shah iehnoh bein, u Myntri Rangbah ka jylla u Conrad K Sangma haka sngi balang u la aiti ia ka cheque kaba T.1 Cr sha ka Hospital Shillong, Nazareth. Ka Hospital kan ioh shuh sa Rs. 1 Cr ha kaba aiti ia ka kot jingpyndonkam.
Haba kren ha kane ka sngi, u myntri rangbah u la ong ba ka sorkar ka long kaba shimkhia bad kaba phaikhmat sha ka tnad ka koit ka khiah wat hapdeng ki jingeh kiba bun kiba don ha kane ka tnad.
“Ka Jylla Meghalaya ka don ka jingmang pisa kaba heh tam ha ka liang ka koit ka khiah haba ianujor bad kino kino ki jylla ha ka ri; ka bynta kaba heh jong ka mang tyngka la pyndonkam na ka bynta ban pynbha ia ki jingtei”, u la ong.
“Ki thong jong ngi ha kaba kut ki long kumjuh, kata ban ai ka jingsumar kaba bha, kaba paka bad kaba rem dor sha ki paidbah bad hangne ngi lah ban ïatreilang bad ki hospital bapher bapher,” u la ong haba pyntip ïa ka jingïalang shaphang ka jingsdang bad ka jingpynwandur ïa ka Meghalaya Health Advancement Policy.
Ka Administrator ka Nazareth Hospital, Shillong, ka Sr Noreen ka la ong ba ia kane ka jingiarap pisa yn pyndonkam ha kaba thied ia ki tiar pynim bad ki kor pynhiar mynsiem na ka bynta ka Emergency Trauma Unit, Maternity Care bad Neonatal Intensive Care Unit bad yn pyndonkam ruh na ka bynta ka College of Nursing kaba dang wan ban shim ia ki samla pule shipah ngut man la u snem.