Ka jingiap jong ki briew na ka daw jong ka jingtwa ki lum ki wah, ki surok bad ki iing ki sem na ka daw jong ka jingther palat liam jong u lapbah lapsan ha kine ki khyndiat sngi ka la poi sha ka 20 ngut.
Napdeng kine ki 20 ngut kiba iap ki kynthup 13 ngut na East Khasi Hills, 4 ngut na Garo Hills, 2 ngut ha South West Khasi Hills bad uwei ha East Jaintia Hills.
Napdeng kine kiba la khlad ki kynthup ia 4 ngut na ka shnong Laitlarem kiba dei na ka juh ka longiing kaba don ha ki thain Nongspung kaba hap hapoh ka Mawphlang Block 5 ngut kiwei pat ka dei ha ka shnong Dangar hajan Balat ha kaba ki 4 ngut ki khun lem bad ka kmie ki la khlad. Nalor kane ki shikurim kiba dei na ka shnong Kenmynsaw kaba hap hapoh ka Mawsynraw Block ruh ki la ngat lang ha kane ka apot.
2 ngut na South West Khasi Hills kiba la iap ki kynthup ia kawei ka longkmie ha Jashiar ka shnong kaba don hajan ka Wah Rilang bad uwei pat u shipai BSF uba la iap udei uba pahara ha khappud jong ka Lalghat Border Outpost South West Khasi Hills District kaba hap hapoh Ranikor Block.
Uwei pat napdeng kiba kiba la duh noh ia ka mynsiem ba kordor udei u nongbud jong kawei ka trok uba kyrteng u Bishujit Chakrabarty uba la jahrngai ha surok bah ha Lumshnong hadien ba ka trok ka liat sha ka bynta ba la twa jong ka surok.
Katkum ka khubor na ka tnad Disaster Management Authority la iathuh ba hpoh ki 24 kynta ki la don kumba 20 tylli ki shnong kiba la shah ktah bad kumba 134 ngut ki briew kiba la shong khlem jaka rieh.
Na ka liang jong ka sorkar ka la ai jingiarap T.4 lak marwei sha ki longiing jong kito kiba la khlad noh
