Shillong – Ka Tnad Pule puthi ka Sorkar India lyngba ka Ministry of Education ka la aipor biang sa sa 15 Sngi ia ka Committee jong ar ngut ki dkhot ban aiti ia ka kaiphot kaba biang ia ka jingtohkit halor ki jingkynnoh ia jingpyniaid bakla ia ki kam bad bym biang bym bit ka rukom treikam ba ka skul Bah NEHU.
Ka tnad Ministry of Education kaba la buh por ia ka Kommitee ban pyndep hapoh ka 29 tarik u Naiwieng hynrei la pynjlan biang sa 15 Sngi.
Ha ka Shithi ba la phah da u Under Secretary ka Sorkar Pdeng u D.K. Himanshu sha u Chairman ka Inquiry Committee bad Chairman ka UGC u Prof.DP Singh ha ka Sngi Thohdieng.
Ha ka Shithi ba la phah ka Ong “Ha kaba iadei bad ka Shithi na ka Ministry ba 14 tarik u Naiwieng bad ka shithi u Chairman ka Inquiry Committee ba 28 tarik u Naiwieng 2024 ka la Ong ba ka bor khmih ka la ai por biang sa 15 Sngi ban pyndep pura ia ka jingtohkit bad aiti ia ka kaiphot ha ka por ba la buh.
Ka Ministry of Education ka la thung ia ka Kommitee jong ar ngut ki dkhot ban tohkit ia ki jingkynnoh ba kynrum kynram ka rukom treikam.
Katei ka rai ka la shim halor ka jingiakhih shah thngan khlem buh Sngi da ka NEHUSU bad la ai jingkyrshan da ka KSU NEHU ba dawa weng kam mardor ia u Vice Chancellor Prof PS Shukla u Registar bad Deputy Registrar.
Arngut ki dkhot ka Committee myn ha ka 25 tarik u Naiwieng ki la leit iakynduh ban sngap ia baroh ki kynhun seng ka NEHU bad nonghikai kynthup ki samla pule ban ioh ka khubor kaba shai kumba la mih ha ki lad pathai khubor. Ba kim kwah shuh bad kim pdiang ia u VC ban wanphai biang.
Ka Hukum ka Ministry ka iathuh “Namar ki jingpynsngew jong ki samla pule bad ki khubor ba mih ka la rai ban thung da ka Inquiry Committee.
Ka jingkynnoh ia ka jingbym biang bymbit ka rukom pyniaid kam ha NEHU ka la dep poi sha Ministry o
f Education.
Ha kawei pat ka liang ka khubor Ka Ministry of Education ka Sorkar Pdeng, kala pynbna ia ka shuti jong u Vice Chancellor Prof PS Shukla, ban kiar na ka huri hura kaba lah ban mih namar ka jingpyrshah jong ki kynhun bapher bapher ha NEHU ba un wan shimti biang ia ka kam.
Ka MoE kala pynjlan ia ka shuthi sha ka 13 tarik u Nohprah,
U Prof Shukla ula pan ia ka bor pahara kaba khlain na ka Sorkar Pdeng ba un leit shimti biang ia ka shuki Vice Chancellor ka NEHU hynne ka 2 tarik Nohphrah.
Ha ka shithi bala phah sha u Principal Secretary in-charge Higher Education, ka Sorkar India, u Prof Shukla ula ong “Ka shuti jong nga kan kut ha ka 29.11.2024, bad ngan leit shimti biang ia ka kam ha NEHU ha ka 02.12.2024”.
Myn ha ka Sngi 1 bad 2 tarik u Nohprah ki samla pule ba dang don hapdeng ka jingiakhih ha NEHU kaba la ialam da ka NEHUSU bad KSU-NEHU Unit, kila ieng pahara ha khyrdop jong ka skulbah hynne ka step naduh ka por 8:30 baje da ka jingthmu ban pakhang lynti ia u Prof PS Shukla ba un wan rung sha campus.
Nalor kane, ki samla pule ha ryngkat ki Nonghikai, kila ialum paidbah ruh habar jong ka Administrative Block, ban ap ia ka khubor halor ka jingwan u Prof Shukla.
Kat kum ka jingong jong u, ka Committee ki arngut ki dkhot bala thung da ka Ministry ban tohkit ia ki kam ka NEHU, kan dang ban aiti ia ka kaiphod halor kane ka kam.
La jan shibnai, ka jingshim klas kan dang ban long biang hadien ka jingiakhih ba dang bteng jongka NEHUSU bad ka KSU-NEHU Unit. Dang shen, kine ki artylli ki seng kila pynsangeh shuwa shipor ia ka jingiakhih da kaba shah thngan khlem pud hadien ba ki samla pule kila poi sha hospital na ka jingkem tlot ka met hadien ka jingshah thngan ba 16 sngi.