Shillong, 3 Naitung 2025:
Ka Meghalaya High Court hapoh ka jingïalam u Chief Justice I.P. Mukherjee bad u Justice W. Diengdoh ka la ai rai halor lai tylli ki appeal na ki nongshongwai kiba shong ha ki jaka jong ka Ministry of Defence ha Shillong Cantonment, kiba la pyrshah ïa ka jingkiew kynsan palat pud ka baiwai (lease rent) naduh u bnai Ïaiong 2022.
La ong ba naduh ki por ba la leit noh, ki nongshongwai ki la siew tang T. 3 shibnai hynrei hadien ka 1 tarik u Ïaiong 2022, ka Shillong Cantonment Board lyngba ka jingpynbna jong ka Ministry of Defence ka la pynkiew ia ka baiwai sha palat T. 13,000 shibnai da kaba pyntreikam ia ka rukom buh rent kaba kyrteng Standard Rent Determination (STR), kaba thew 2.5% na ka dor mar khlaw (market value) jong ka jaka.
Ki nongshongwai kiba dei ki dkhot jong ka kynhun bad ar ngut ki paidbah shimet ki la mudui sha Iingkashari ha kaba ki la kynnoh ba ka jingkiew ka long kaba khlem daw, bad ba ka sorkar kam shym la pynshai paidbah satia shaphang kane.
Ka Iingkashari ha ka rai ba ka la ai mynta ka sngi ka la pdiang ba ka sorkar ka don hok ban buh bad pynkiew ia ka baiwai katkum ka STR, hynrei ka la ong ruh ba kum ka bor paidbah ka dei ban leh da ka jinghok, jingkhein paidbah bad ka jingpynshai kaba biang. Ka la kdew ruh ïa ki rai ba kongsan jong ka Supreme Court halor ka rukom treikam jong ki bor sorkar ha ki kam pateng paidbah.
Ki kyndon ba la ai da ka Iingkashari:
Ki nongshongwai baroh ki hap ban siew 40% na ka baiwai bala lum (arrears) naduh 1 Ïaiong 2022 haduh 31 Jymmang 2025, da kaba kut haduh 31 Nohprah 2025.
Ha ki bnai kiba mynta, ki hap ban siew 40% na ka dor baiwai kaba mynta naduh u Naitung 2025 shakhmat, manla ka por.
Ka Ministry of Defence bad ki bor ba peit ïa ki jaka kin hap pynmih demand notice ba pura bad thikna, bad ki pisa ba la dep siew kin pynlait ne pyndap noh.
Lada don jingbym siew, ka sorkar ka lah ban shim ki lad aiñ ba dei hok.
Ka Iingkashari ka la pynkylla ïa ka hukum kaba la ai da u Judge shuwa, da kaba ai ka lad kaba khambynruit ïa ki nongshongwai ban pynbeit ia ka pisa ha ka por ba biang.
Ka rai ka long ka nuksa ba ka hok paidbah bad ka jingsngewkhia ïa ka jingeh jong ki paidbah ki dei ban long shibynta ha ka jingsynshar.