Shillong – Ka EC jong ka Khasi Hills Autonomous District Council (KHADC) kaba la lam khmat da ka Voice of the People Party (VPP) ka la pynbna ban weng noh ia ki 13 ngut ki nongtrei ba thymmai bad ban weng noh ruh ia ka regularisation jong ki 30 ngut ki nongtrei casual, hadien ba la lap ba ki la shah thung kam khlem da don ki post ba la ai jingbit.
U Chief Executive Member (CEM) ka KHADC, Shemborlang Rynjah, u la ong ba kane ka rai ka la long katkum ka kyrwoh ba la ai da ka komiti ba la thaw da ka EC ban pynbeit ia ka rukom treikam jong ka council. Kane ka komiti ka la shong haduh san sien ban bishar bniah ia ki kam ha ka district council bad ha kane ka jingbishar, la lap ba don 43 ngut ki nongtrei ba la shah thung khlem da don post ba la ai jingbit – 13 ngut ki ba thymmai bad 30 ngut ki nongtrei casual ba la regularise.
“Hadien ka jingbishar bniah, ngi la lap ba kine ki jingthung kam ki long khlem da don post ba la ai jingbit,” la ong u Rynjah.
“Ngi la rai ban pynduh noh ia ka kam jong ki 13 ngut ba la thung thymmai bad ia kito ki 30 ngut ba la regularise, ngi la rai ban weng noh ka regularisation bad ailad ia ki ban bteng kum ki nongtrei casual.”
U la ong ruh ba kitei ki 13 ngut ki nongtrei thymmai ki la leit trei ha u July bad December jong u snem ba la leit noh, bad ki kynthup ia ki enforcement constable, peon, mali, cleaner bad kiwei.
U Rynjah u la kdew ba ka KHADC ka don ha ka jingshah ktah ha ka pisa, ha kaba ka siew tulop jong ki palat 70 ngut ki contractual employee ka long lyngba ka 5% administrative charge na ki skhim bapher bapher.
U la iathuh ba ki nongtrei ba shah ktah ha kane ka rai ki la leit ia kynduh ia u ban kyrpad ban pynkylla ia ka rai, hynrei u la pynpaw ba ka EC kam don jingthmu ban pynkylla ia ka rai.
Ngi la ailad ia ki, lada ki kwah ban bteng kum ki nongtrei casual lane ban ieh noh,” la ong u Rynjah.
U la ong ruh ba ka EC kan sa leh da kaba tynruh halor ki jingthung kam ba la leh khlem post ba la ai jingbit, bad ka komiti ban pynbeit ia ka administration kan sa peit bniah ruh halor ka jingdonkam ban pynkylla ia ki service rules.
Ngi la rai ruh ban thaw da ka komiti ban thungkam (recruitment committee) ban pynshai bad pynkhuid ia ka rukom thungkam ha ka council,” u la bynrap.