Ba la wan ka aiom Lyiur lum jingïalang u Myntri Rangbah ban khreh lypa kiei ki ban jia

Shillong, 2 Jymmang 2025- U Myntri Rangbah ka Jylla, u Conrad K Sangma, mynta ka sngi u la lum ka jingialang bad ka State Disaster Management Authority bad kiwei ki tnad ban bishar bniah ia ka jingpynkhreh jong ka jylla na ka bynta ka jinglynshop slap.
Ha kane ka jingiakynduh la donlang ruh u Symbud Myntri Rangbah ka Jylla, u bah Prestone Tynsong, myntri ka tnad ka koit ka khiah ka kong Ampareen Lyngdoh, u Chief Secretary ka jylla u bah D P Wahlang bad ki heh ophisar na IMD, PHE, ka Koit ka Khiah, PWD, Power etc.
Ki Deputy Commissioner bad ki ophisar jong ki district na baroh ki district jong ka jylla ki la wan ban iashim bynta lang ha kane ka jingialang lyngba ka video conferencing.
U Myntri Rangbah ka Jylla haba shim ia ka jingkhein ia ka jingpynkhreh na ka bynta ki slap ki ban sa wan u la ong ba ka jingiatreilang kaba biang hapdeng ki tnad bad ki seng bapher bapher ka long kaba kongsan ha ka plan pynkhreh bad pynduna ia ki jingktah hynrei ka pynthikna ruh ia ka jingpynkhreh kaba paka ban lait ia ka jingduhnong bad jingjynjar ki paidbah ka jylla.
U la bynrap ruh ba dei ban pynbiang mardor ïa ki jingïarap, ka um bad ka ïing lada jia ba don kano kano ka jingjia. Haba pynksan ia ka bynta bad ka jingdonkti jong ki Block Disaster Management Committee, ki Komiti Pyniaid ia ki jingjia ba sngewsih jong ki shnong bad ki Komiti pyniaid shnong u Myntri Rangbah u la bthah ia ki deputy commissioner ban khot ia ki jingialang man ka por bad bynrap ba ki jingbthah bad ki jingbthah kiba kyrpang bad kiba la batai bha dei ban ai sha ki shnong.
U la ban jur ruh halor ka jingdonkam ban pynphriang ia ki jingtip sha ki briew ha ki kyrdan ba shapoh ha ka rukom kaba ryntih lyngba ki lad pathai khubor bapher bapher bad ha ki ktien trai ri. U la pyntip ruh shaphang ki lad ki lynti ba la shim da ka sorkar ban pynbha ïa ki rukom ai jingmaham kloi bad bynrap, “Man la ka thaiñ ka don la ki jong ki jingduna bad ka sorkar ka dang shim ïa ki sienjam ban map ïa ki jingma kum ka jingshlei um ha Garo Hills bad ka jingtwa khyndew ha Jaiñtia Hills bad ban thaw ïa ka rukom treikam na ka bynta ban tip kloi bad ban tip lypa.”
U Myntri Rangbah ka Jylla u la bishar bniah ruh ia ka jingdon jong ka bor briew, ka jingbuh jingkynmaw/ki tiar kum ki kor pynkynriah khyndew, ki lieng bad kiwei kiwei U la ong ruh ba ka surok, ka um bad ka bor ding ki dei ki bynta kiba kongsan kiba shah ktah jur bad u la bthah ia kine ki bynta ban pynkhreh kham bha.