Shillong, Jymmang 23 : Hadien ba Ka seng Hynniewtrep Youth Council (HYC) dang step jong ka 23 Tarik u Jymmang Palei, kala dep kyndang naphang ia ki Iing kiba kynnoh shna be-ain bad ba pynkylla slum ia ka jaka jong ka Defence Estate Office (Guwahati) kaba don ha Lum Survey, Shillong.
Katba ka tnad pulit bad ki tnad sorkar ki dang ioh ioh thiah lyngngai ka HYC ka la pyndep ia ka kam iatur paidbah sha kane ka jaka ban pynpra lut ploin ia ki 80 tylli ki Iing kiba kynnoh shna beain da ki bar Jylla ha kane ka jaka.
Hadien ba ka HYC ka la dep byrngem shwa ia ka sorkar ban ai por ba ka dei ban kyndang namar ba ki sah beain ha kaba ka HYC ka la dep iaid da ka lynti kaba dei bad ka hok jong ka Aiñ.
Phewse ki tnad sorkar ki leh kyllut tang ka tnad MeECL ka la leh ia la ka kmaram lajong ban ot lut ia ki bording elektrik jong kine ki Iing hadien ka jingioh pdiang ia ka jingujor na ka HYC bad ka jingshem ruh dalade ba kine ki iing kila shu ring tuh ia ka bording khlem da ioh jingbit.
Kane ka jinghiar kyndang ia kine ki Iing beain, kala jia ruh hadien ka jingiohi ba ki Bor District bad ka Defence Estate Office (Guwahati) kila shu shong kli kti bad khlem leh eiei wat hadien bala pynshisha ia ka jingsah beain jong kine ki bar Jylla kiba wan na Assam, Uttar Pradesh bad kiwei kiwei ki Jylla ka Ri.
Lah ban kdew ba ki bor District ka East Khasi Hills lem bad ka Ophis u Defence Estate Officer (Guwahati) ha ka 8 tarik Jymmang, kila leit jurip ia kane ka jaka ha Lum Survey bad lap dala ki khmat ia ki 80 tylli ki Iing ba shna beain.
U Additional District Magistrate (ADM), ula lum kyrteng ia baroh ki trai jong kine ki Iing ha Lum Survey ban aiti sha u Deputy Commissioner ba un leh ia kaba donkam.
Na ka Liang u lad pathai khubor haba ioh ban ring dur khih ha Lum Survey la iohi ba ki Iing ki shah kynrang ki tin sop Iing, ki lyntang bad kitei ki briew ki la rah la rong ia ki tum ki tam jong ki.
Haba ioh ban iakren bad ki nongshong dukan ha thaiñ Bimola ki la ai ka jingiaroh ia ka Seng HYC ba ka pyni da ka kam.
Kitei ki nongshong dukan ki ai burom ia ki seng Bhalang ba ki nud lada ki leh bad kyndang ia kaba sniew.
Ki la buh jingkylli ia ka sorkar naduh ka tnad pulit ki tnad sorkar balei Kim nud ban kyndang ia ki briew ba shong beaiñ balei hap mih ki seng Bhalang.
Lada shong beaiñ ki Jaidbynriew khasi ki beh ki kyndang khlem jingmap wat lada kyrpad ban ailad ban wad jaka katba ia ki khyllah jait ki ai jaka.