Shillong, 19 Naitung 2025:
U Bah Nicky Kharkamni, uwei na ki rangbah paidbah uba la ju iashim bynta ha ki kam synshar paidbah, u la pynpaw da ka jingpyrshah kaba jur halor ka jinglong leh matlah bad bym shim khia jong ki bor synshar bad ki dorbar shnong halor ka jingbret pathar dusmon ha Golflink, Shillong.
Ha ka jingkren jong u, u la ong ba ka Golflink kaba la tip kum ka jaka ba don bynta ha ka King Edward Colony, ka la kylla long kum ka “Marten kaba thymmai,” namar ka jingbym don da ka rukom pynkhuid kaba biang bad ka jingbret pathar dusmon da ki paidbah.
“Ym don shuh ka jingtynjuh na ki bor synshar shnong lane ki ophisar. Ki briew ki bret dusmon kumba ki bret ha Marten. Ka shong ha ka KHADC, ka Shillong Municipal Board bad ruh ki dorbar shnong ban pynshitom ia kito kiba pynjaboh ia ka mariang,” la ong u Bah Kharkamni.
U la kylli ruh balei ki ophisar sorkar, kiba ju iaid lynti na katei ka surok ha Golflink, kim sngewthuh satia ia ka jingeh kaba la ktah bha ia ki paidbah, khamtam ia ki longïing ba shong marjan. U la kynnoh ruh ba ki dorbar shnong jong ka Pynthorumkhrah kim don ka jingkitkhlieh bad kim pynlong da eiei ban tem ia kane ka jingleh tuh dusmon.
“Ka Shillong Club, kaba dei ka bynta jong kane ka thain, kam shim jingkitkhlieh satia. Balei kim tieng ia ka aiñ? Ka aiñ ka shong tang ha ki briew rit, katba kiba don pisa kim tieng ei ei,” la ther shuh shuh u Bah Kharkamni.
U la ong ruh ba imat ka jingmut jingpyrkhat jong ki paidbah ka la suki bha, haduh ba kim sngew shuh ia ka jingma na ka jingbret pathar dusmon kaba lah ban ktah ia ka koit ka khiah bad ka lawei jong ka mariang.
Kiba bun ki paidbah ba sah marjan ki pynpaw ka jingsngewnguh halor ka jingpyrshah jong u Bah Kharkamni bad ki kyntu ia ki bor ba dei peit ban shim khia mardor.