Mawkyrwat, Lber 11, 2024
Da ka jingthmu ban kyntiew ia ka sap ka phong bad ban plie lad ia ki samla don sap ban mih pyrthei ha ki rynsan iakop, ka Seng Samla Shnong Mawkyrwat kan pynlong ia ka jingiakop tem ba la tip kum ka Beat Contest ha ka 23 tarik u Lber, 2024 ha Mawkyrwat, South West Khasi Hills District.
Haba kren ha ki lad pathai khubor ha Mawkyrwat mynta ka Sngi, u President ka Seng Samla Shnong Mawkyrwat, Bah Kitborsing Lyngdoh bad Secretary, Bah Dawning Marwein, ki la iathuh ba ka theme jong kane ka Beat Contest ka long ‘Rock without Drugs’, ha kaba ka thong hi ka long ban iakhun pyrshah ia u drok, uba la kynrei pynjot bad pynjot ia bun ngut ki khun samla napoh ka District.
Nalor kane ka iakop tem na ka bynta ki kynhun tem napoh South West Khasi Hills District, ha katei ka sngi kan don ruh ka Awareness Programme halor ka jingsniew jong u drok, ka Concert da kawei ka kynhun tem ba pawnam na Shillong bad yn pynkut da ka DJ.
Kumta ka Seng Samla Shnong Mawkyrwat ka khot ka wer ia ki kynhun tem napoh ka District ba kin wan ban iashimbynta ha kaba ka khusnam ka long kaba heh, bad ka khot ruh ia ki paitbah ba kin wan ban sakhilang bad khamtam ban shim ia ka rai ban ialeh pyrshah ia u drok.