Nongpoh 3 Rymphang 2024
Ka jingiakren halor ka jingwanrung kyrthep jong ki briew kiba nabar ka dei kawei na ki mat kaba kum ki khun samla ieid ri ki ju pynkynmaw na ka por sha ka por ba sha ka sorkar pdeng lyngba ka sorkar jylla ba kan pynurlong noh iaka jingdawa ban pynlong ain noh iaka Inner Line Permit hapoh ka Jylla Meghalaya bad ka jingwan khaii jong ki briew kiba nabar khlem don iaki kot ki sla kiba biang kiba wat ki bor jong ka District Council ki mih na ka por sha ka por ban bthah iaki bar jylla ban pynbiang iaki kot ki sla haba ki wan ban sdang khaii hapoh ka Jylla Meghalaya.
4 ngut ki bar jylla kiba la khreh ban wan die jingdie da kaba pynlong dukan harud ka surok bah National Highway 6 haki artylli ki jaka kawei haka shnong Saiden bad kawei pat ha Shangbangla ki shnong kiba hap ha Ri Bhoi District ha kaba ki dang shu sdang dang ha kine ki shisngi bad arsngi, Marsien iohi ia katei ka jingthmu jong kitei ki bar jylla kiba thmu ban wan sdang iaka kam khaii pateng khlem ki kot ki sla bad khlem ka jingioh jingbit, ki Dkhot jong ka Seng KSU kiba kynthup ia u Samla John Lyngdoh uba dei u President ka Seng na Nongpoh Circle, nangta u samla Iabhalang Nongrum uba dei u President ka Seng na Nongpoh Town haka jingiadonlang jong u Sports Secretary ka Seng na North Khasi Hills District Unit u samla Johny Nongrum ki la leit ban beh krat ia kitei ki bar jylla da kaba phah lum ia kitei ki tiar ba ki wan die bad phah leitphai na ka jaka ba ki wan.
Kine ki bar jylla kiba sdang ban leh ia kane ka kam khaii ha Ri Bhoi District ki dei kiba die iaki pipe um kiba don ia u kor jingkyrwait na ka bynta ban pynsuk ha kaban sait kali, u President ka Nongpoh Circle u Samla John Lyngdoh u la ong ba ki briew jong ka jylla ki don ia kiba kum kine ki jait tiar ban die bad ki la die ruh haki dukan jong ki bad ka jingwan jong kine ki briew ka lah long kumba ki wan knieh iaka pliang ja jong ki trai jylla nalor ba ki wan khlem ka jingioh jingbit ban sdang iaki kam khaii hapoh ka jylla.