Shillong – Ka Dorbar Shnong Ryngud Hima Syiemship Sohra ka la pynlong ia ka Tamasa Tharia Wah ha ka Wahrew ne ka Beach Festival kaba la long myn ha ka 13 tarik u Kyllalyngkot 2024. Ia katei ka tamasa tlang kaba la tip kum ka “Tharia Wah Rew” la wan plie da u Bah A L.Hek, myntri ka TNad Fisheries bad Animals Husbandry Vetenery ka Sorkar Jylla ha ka jingiadonlang u Bah Khrawboklang Basaiawmoit, state vice-president BJP, Dr.Fenela L.Nonglait, u Paiem Freeman Syiem ka Hima Sohra, u Sordar shnong bah Edmund Khongsya bad ki nongkitkam ka Umrew Beach Festival. Ka Tamasa Tharia Wah Rew, harud Wah ka dei ka sien kaba nyngkong ia ka shnong Ryngud ban pynlong kum shi bynta ban pynkut ia ka Jingdap 50 jong ka shnong. Shuh shuh na ka jingiathuh u Sordar shnong Ryngud u Bah Edmund Khongsya ka Shnong kum ka jingpynkhreh ban pynkut ia ka Jubilee jong ka shnong ka la shim ka rai ban pynlong ia ka tamasa Beach Festival ia kaba la shim bynta da ki nongshong shnong kum ka jingiakop jngi, ka jingialehkai Volleyball, ka Iasiat Khnam bad kiwei kiwei pynsngew u Sordar shnong. Ha jingpynlong ia ka Tamasa Tharia Wah ha Wah Rew ka dei ka jingpynkynmaw ia ka Iew iadie iathied ka Shnong Ryngud Hima Sohra ia ki Mar Rep bad ki Soh ki pai kum u Sohpieng uba jur bha ban iadie ha katei ka Wah Rew namar ba ki Khar Bangla ki ju wan da ka lieng ban kit ban rong sha Bangladesh na Riwar Sohra namarkata kane ka jaka Iadie iathied ka Hat la ju tip kum ka “Hat Sohpieng” iathuh u Bah Khongsya. Ka Shnong Ryngud ryngkat bad ki nongshong shnong jong ka shnong Ryngud kawei na ki shnong kaba dang hap ha ka thaiñ Sohra ka dei ka jaka kaba jur u kwai bad tympew jong ka shnong u dei uwei na kiba mar bakongsan bha bad u dei ruh u markhaii uba long u budlum jong ka ïoh ka kot ïa kane ka shnong namar ha ki por mynshuwa kane ka don ia ka hat iadie iathied bad ka RI Bangladesh naduh shwa ka jingioh laitluid ka ri India haduh ban da ioh ka jylla la kajong ha u snem 1972 kane ka shnong ka im beit da ki kam rep ban Khaii Khabar ia ki soh ki pai bad u kwai u tympew kumjuh u Sohmrit bad u sla Latyrpad. Ka shnong Ryngud ha ki por mynshuwa ki wahheh ki la kyrhuh bad ki wahduid ruh ki shlei lut kat haduh ba la mih ruh wat ki umpohliew ha manla ki jaka. Kumjuh ki nongshong shnong ki pahuh pahai mynta kam long shuh naduh ba la khang dam ia ka Iew ka Hat Ryngud kaba don ha Wah Rew hadien ba la don ka thma India bad Pakistan ha u 1972 katei ka Iew Khaii Khabar ka la jah noh. Ka jingduh noh katei ka hat Sohpieng, Ryngud ha WahRew namar ha kitei ki snem ka Bangladesh ka hap ha ka jingsynshar jong ka Ri Pakistan ka la don ka thma ban knieh ia ka Bangladesh ban don bad ka Ri Pakistan da ka jingiarap jong ka Indira Gandhi ka Myntri Rangbahduh ka Ri India ka la dakhol ia ka Pakistan ban ai jingiada ia ka Bangladesh.Ha ka jingshisha ka tamasa Tharia Wah Rew ka la don teng ha ki 1984 ba la ju leh da ka Hima Sohra bad ka Shnong Ryngud ban pynim ban pynkynmaw ia ka jingiadei ia ka HAT Sohpieng hynrei ka shu jah da ki phew snem iathuh u Sordar shnong Ryngud. Mynta ka shnong ka la kwah ban pynim biang.
