Shillong Nohprah 4 – U Myntri Rangbah ka Jylla Conrad K Sangma mynta ka sngi u la buh ia u maw nongrim jong ka Shillong Ropeway Project, ia kaba la plie da u President ka Ri India u Droupadi Murmu ha ka 16 tarik Jymmang mynta u snem ha ka jingiadon lang u myntri ka tnad jngohkai pyrthei u bah Paul Lyngdoh. Ia ka plan kaba pyni ia ka jingbuh mawnongrim la plie paidbah ha ka jaka jong ka projek – Shillong peak view point.
Ha kane ka jingïalang, u myntri rangbah bad u myntri ka tnad jngohkai pyrthei u la aiti ïa ka shithi pdiang sha ka kompeni shna ïing – KEC International Limited – Tantia Construction Limited JV, ban sdang thikna ïa ka jingtei ïa kane ka projek ba donnam, kaba la antad ba kan kot sha ka 175 Klur tyngka Kane ka dei ka projek lynti kit nongleit nongwan kaba nyngkong eh ha Meghalaya, ha kaba yn pyntreikam ha ka jingïatreilang bad ka kompeni POMA kaba don ha France, kaba ka kamram jong ka kan long nyngkong eh ban pynbiang ïa ki tiar na ka bynta kane ka projek. Ka sorkar jylla ka la thaw bun ki projek pynroi ban kyntiew ia ka kam jngohkai pyrthei, ka projek ropeway ka dei kawei na kum kine ki jingiarap.
U myntri rangbah ka jylla u la aiti ruh ia ka bhah kaba ar kaba long INR 1.5 Klur sha u bah Glanding Lyngdoh general secretary ka Riat Laban Dorban Pyllum, 3 Klur na ka bynta ban siew bai lutksan ia ka jaka. Haba kren ha kane ka sngi,
u myntri rangbah u la ai khublei ia ki nongshim bynta kiba la pyndep ia ki kot ki sla kiba donkam bad ki jingpynbeit ba thikna ban sdang ia ka projek. . Ka jingsdang ia ka projek ka dei ka jingmih na ka jingpynkhreh kaba saw snem kaba jrong”, Kane ka projek kan iaid lyngba ka Laban, Madan Laban, Upper Lumparing, Lower Lumparing, Lumkjatsngi, Oxford Hills bad Rngi Shillong. Haba kren shaphang ka jingiatreilang jong ki paidbah na ka bynta katei ka projek, u myntri rangbah u la ong, “Ka long kaba kongsan bha ba ki paidbah kin iatreilang bad ka sorkar. Ka projek ka dei ka jingmih na ka jingiatreilang hapdeng baroh ki nongshim bynta. Kane ka projek kan pynthikna ia ka jinglum khajna, kaba ai jingmyntoi ia ka Dorbar . la kynthoh u myntri rangbah.
U la pyntip shuh shuh ba ka sorkar ka dang trei ïa kiwei pat ki lynti ki ban pynïasoh bad ki jaka jngohkai pyrthei bad ruh ban pynduna ïa ka jingkhapngiah ha ka jaka hiar jong ka Ropeway ha Madan Laban. U la pyntip ruh ba ka sorkar kan sa shna da ka Alternate Route kaba jngai kumba 4 km kaba pyniasoh bad ka surok bah kaba don ha 101 Area, Upper Shillong.
Kiwei pat kiba la ïadon lang ki kynthup ïa u Chairman ka Meghalaya Tourism Development Corporation u bah Sanbor Shullai, u Chief Secretary u D. P. Wahlang, u Commissioner & Secretary ka tnad jngohkai pyrthei u Dr. Diengdoh.