Shillong, 22 Naitung 2025:
Ka ophis jong ka Deputy Commissioner ka Commissionerate of Food Safety, hapoh ka jingïalam ka Kong DB Mukhim, ka la pynlong ïa ka jingkhynra kynsan ha ki dukan die jingbam bad ki dukan dairy ha ka thain Nongthymmai, Shillong. Ha kane ka jingkhynra, la lap ba bun ki dukan ki la pynkheiñ ïa ki kyndon jong ka Food Safety and Standards Authority of India (FSSAI) bad la shimkhia ban khang khyrdep noh ïa saw tylli ki dukan dairy.
Ki bor synshar la lap ba bun ki jingbam ha kine ki dukan ki la shu sheh da ka umphñiang ba sniew bad bym biang shuh, kaba lah ban buh jingma ïa ka koit ka khiah jong ki nongthied. Ki marbam kiba la kut ka tarik ruh la ioh bat bad bret noh sha ki jaka bret jaboh da ka team na ka tnad Food Safety.
Ha ka jingïakren bad ki lad pathai khubor, ka Kong DB Mukhim ka la ong ba kane ka jingkhynra ka pyni shai ba bun ki dukan, wat la ki i phieng na shabar, hynrei shapoh pat ki long kiba jakhlia haduh katta, khamtam ha ki jaka shet, buh ne lehmar jingbam. Ka la ong ruh ba kane ka long ka jingma kaba shyrkhei ïa ka jingkoit jingkhiah jong ki paidbah.
La lap ruh ba don ki dukan kiba dang trei khlem da ioh License na ka FSSAI, kaba long pyrshah ia ki kyndon aiñ. Ha kawei ka jaka, la lap ruh ba u trai dukan u la pyrshang ban khang khyrdep noh bad phet krad haba iohi ïa ki bor pahara, hynrei ka kynhun na ka ophis ka la bteng beit ïa ka jingkhynra.
Ka Kong DB Mukhim ka la pynsngew shai ba ka tnad Food Safety kan ym shong kli kti shuh ha kane ka kam. Ka la bthah ïa ki trai dukan ban bud ryntih ïa ki kyndon ka FSSAI bad ban pynkhuid pynmiat ïa ki jaka shet bad die jingbam. Lada kim sngap, la pynbna ba yn blacklist noh ïa ka dukan, bad kin ym lah shuh ban plie ïa ki business jong ki ha ki sngi ban sa wan.
Ka tnad Commissionerate of Food Safety ka la pyntip ruh ba kane ka kam khynra ka dei ka bynta jong ka jingpyrshang ban pynneh ïa ka jingsngewkhuid bad jingshngaiñ ha kaba ïadei bad ka bam ka dih. Ka la ong ruh ba yn dang bteng ïa ki jingkhynra ha kiwei pat ki jaka ha Shillong ha ki sngi ban wan.
La kyntu ruh ïa ki paidbah ba kin kyrpad sha ka ophis lada lap ïa kino kino ki kam shet bam kiba pynmih jingartatien lane bym biang ïa ka koit ka khiah.