MEGHALAYA : Ka Khasi Jaintia Deficit School Teachers’ Association (KJDSTA) ha ryngkat ka Garo Hills Deficit School Teachers’ Association (GHDSTA) ki la leit ban ïakynduh ïa u Myntri Sorkar ba dei peit ïa ka pule puthi ka jylla, u Bah Lahkmen Rymbui, ha ka 12 tarik Naiwieng, ban buh pyrthei ïa ki jingeh bad ki mat jingdawa kiba ki nonghikai Deficit ki ïakynduh man ka por.
Hadien ka jingïalang, u Bah Boswell S. Pala, President ka KJDSTA, haba kren sha ki lad pathai khubor, u ong ba ki la ïoh ban buh da ka joint memorandum sha u Myntri, kaba la kdew shaphang saw tylli ki mat kiba kongsan kaba ïadei bad ka jingeh jong ki nonghikai Deficit.
- Ka jingkren halor ka “categorization” jong ki nonghikai:
U Pala u pynpaw ba ki nonghikai ki la don ka jingsngewsyier hadien ba la don ka jingpynbna ha u bnai Risaw shaphang ka jingpynphai ïa ki nonghikai ha ar bynta. Hynrei u Myntri u la pynshai ba ïa ki nonghikai Deficit ym pat ïa kylli bad kim pat kynthup ha kane ka jingpynbna. Ka jingbthah kaba thymmai halor ka jingpynbeit ïa ka pay structure kan long shakhmat shuwa u 31 tarik Kyllalyngkot bad lah ban treikam naduh u bnai Ïaiong 2026. - Ka jingeh halor ka jingbym ioh DA (Dearness Allowance):
Ka kynhun nonghikai ka pynpaw ka jingpynsyier halor ka jingbym pat ioh ïa ka DA kaba dei ban long kumjuh kum ki nongtrei sorkar. U Pala u ong ba hadien ba ki la ioh 43%, ki la ap pat ïa ka 46%, 49% bad mynta 51% kumba la pyntip ïa ki nongtrei sorkar, hynrei ki nonghikai Deficit pat ki dang sah ha ka 43% haduh mynta. U Myntri u la ong ba ha ka 14 tarik mynta u bnai yn don ka jingïalang bad ki ophisar jong ka Education Department ban bishar kyrpang ïa kane ka bynta bad un sa pynpaw ïa ka rai sha ki nonghikai hadien kata. - Ka jingpynïaid bakla jong ka CPF (Contributory Provident Fund):
U Pala u pyntip ba ki nonghikai kiba la shimkam shuwa ka 1 tarik Iaiong 2010 kim pat sngewthuh shai ïa ka jingpynïaid ïa ka CPF bad bun kiba la shongthait kim pat ioh ïa ka pisa jong ki. Ki don ruh kiba la khlad khlem ioh ïa ki hakhlieh jong ki. U Myntri u la ai jingkular ba ka Board of Trustees ka ban bishar ïa kane ka bynta kan sa shim khia bad ai ka jubab kaba kloi. - Ka jingeh halor ka Maximus Portal:
U Pala u ong ba ka jingpynïaid lyngba ka online portal Maximus ka la wanrah jingeh haduh ba bun ki kyrteng nonghikai kim pat mih ha ka system bad ka jingkhein pisa ruh ka dang lait. Kane ka la pynlong ba wat ka tulop jong u bnai Risaw ruh ym pat ioh haduh mynta. U Myntri u la ong ba lada kane ka rukom treikam thymmai ka pynsuhsat ïa ki nonghikai, ka sorkar kan wad lad ban pynbeit noh mardor.
U Pala u pynpaw ruh ba ki nonghikai Deficit kiba kynthup ïa ki Secondary bad Higher Secondary ki don palat 2000 ngut ha ka jylla. U ong ba kane ka jingpynslem ïa ka tulop bad ki hakhlieh jong ki ka la wanrah ka jingbym shngaiñ bad jingeh ha ka imlang sahlang jong ki nonghikai bad ki longïing jong ki. U kyntu ïa ka sorkar ban shimkhia bad pynbeit noh mardor ïa kine ki mat.