U president jong ka US, U Donald Trump, ula kynnoh ba ka Iran, ka la tyrwa ban ïakren, hynrei, u dang pyrkhat ban pyn i syndon da ki kam shipai ba khlaiñ bha pyrshah ïaka ri iran, halor ka jingpynshitom beiñ ïa ki nongïakhih, ha kaba kat kum ka jingioh kheiñ kyllum lang haduh mynta ka jingshah pynïap ki nong iakhieh ha baroh kawei ka ri iran mynta kala kot da ki spah ngut. Ha ka jingia kren bad ki lad pathai khubor halor ka jing kylli ha ka liang ka tnad Air Force ha ka Sngi U Blei, ba lada ka Iran kan ïaid lait ïa u laiñ ba saw kumba la pynpaw teng mynshwa ba ki nongïakhih kin shah pynïap, u Trump u la ong, “ki la sdang kumta ia mynta haba peit ia ki jingjia mynta hapoh katei ka ri.
Ngi dang peit bniah bha ia kane, la ong u president jong ka US. Ka tnat shipai ka dang peit ia ka, bad ngi dang peit ia ki katto katne ki lad kiba khlain bha. Ngin sa shim ia ka jingkut jingmut, u la pynpaw. Ki jingbyrngem ba dang shen jong u Trump pyrshah ïa ka Iran ki la wan hapdeng ka jingkiew ka jingkulmar ha ka thaiñ Latin America hadien ba la kem ïa u President ka Venezuela u Nicolas Maduro da ki shipai ka US.
U Trump u la pynskhem ba ka Iran ka la tyrwa ban ïakren. Nga tharai ba ki la sngewsih ban shah pyndik ha ka ri America, u la ong. Ka Iran ka kwah ban ïakren. Hynrei u la pynpaw ia ka jingsngewkhia halor ka jingiap jong ki nongiakhih ha Iran.
Ki don palat 538 ngut ki briew kiba la iap ha ki jingkulmar kiba la jia ha ki jingiakhih, ong ka khubor jong ka Human Rights Activists News Agency kaba don ha US. Katei ka kynhun kaba don ha US, ka la kdew ruh ba ki don 10,600 ngut ki briew kiba la shah kem ha ki bor synshar jong ka Iran.
Kawei pat ka nongpeit ia ka hok longbriew manbriew, ka kynhun jong ka Iran Human Rights kaba don ha Norway, ka la iathuh ha ka Sngi U Blei ba ym duna ia ka 192 ngut ki nongiakhih ki la shah pyniap ha ki jingiakhih. Ka long kaba donkam ban tip ba ka jingkheiñ ïa kiba la mynsaw ka ïapher hapdeng ki kynhun ïada hok namar ba ki ïaleh ban ïoh lum ïa ki briew hapoh ka Iran hapdeng ka jingkhang ia ka internet ha ka ri iran.
Ha kajuh ka por, ka sorkar Iran kam shym la ai ïa ki jingkheiñ ba thikna jong ka jingïap, bad ka la long kaba eh ban pynshisha da kaba laitluid ïa ki jingkheiñ. Ka jingpynshitom beiñ kaba shyrkhei ha Iran ka la pynmih ïa ka jingma jong ka jingwan tuklar jong ka US, ha kaba u Trump u la ong ba un “pyllait im” ïa ki nongïakhih lada ka sorkar Iran ka pynïap ïa ki. Ka Iran ka peit ia ka jinglaitluid, kaba ym pat ju jia long mynno mynno ruh. Ka USA ka ieng kloi ban iarap u la ong ha ka Truth Social.
Halor ka jingbyrngem, u nongkren ka parliament jong ka Iran, u Mohammad Baqer Qalibaf, u la maham ïa ka Washington pyrshah ïa ka jingkheiñ bakla, da kaba ong ba ki jingmyntoi jong ka Israel bad ka US ha Middle East kin long ki thong ba dei hok. To ngin long kiba shai ha ka jingjia jong ka jinghiar thma ïa ka Iran, ki jaka ba la shah knieh bad kumjuh ruh baroh ki ktem bad ki lieng jong ka US kin long ka thong ba dei hok jong ngi, ong u Qalibaf, u heh shipai barim ha ki kynhun shipai ba pawnam jong ka Iran.