Ka sorkar ba la ïalam da ki Taliban ha Afghanistan, ka la pynrem ïa ka jingshah thombor jong ki lehnoh ïa ki nongjngohkai pyrthei ha Pahalgam, Jammu and Kashmir, da kaba ong ba kum kine ki jingjia, ki pynthut ïa ki jingpyrshang ban pynneh pynsah ïa ka jingshngaiñ bad ka shongsuk shongsaiñ ha ka thaiñ. Ha ka jingpynlait khubor, ka Taliban ka la pynpaw ruh ïa ka jingsngewlem ïa ki longïing kiba la shah pynjulor ha ka jingshah thombor jong ki lehnoh ha Pahalgam.
U nongaiktien jong ka tnad kam bar ri jong ka Afghanistan kaba la synshar da ki Taliban, u Abdul Qahar Balkhi u la ong, “Ka tnad kam bar ri jong ka Islamic Emirate of Afghanistan ka pynrem jur ïa ka jingshah thombor ba dang shen ïa ki nongjngohkai pyrthei ha ka thaiñ Pahalgam jong ka Jammu and Kashmir, bad ka pynpaw ka jingsngewlem sha ki longïing kiba la duh noh.”
U Abdul Qahar Balkhi u la ong “kum kine ki jingjia ki pynthut ïa ki jingpyrshang ban pynthikna ïa ka jingshngaiñ bad jingshngaiñ ha ka thaiñ.”
Ka India ka la pynbna ban pynsangeh noh ïa ka jingïateh kular jong ki um Indus “da kaba treikam mardor, tad haduh ba ka Pakistan kan kyntait da kaba ngeit bad bym lah ban pynkylla ïa ka jingkyrshan jong ka ïa ki kam lehnoh ba ïaid lait ïa ki pud”.
U myntri bar ri u Vikram Misri u la ong ba ia ka jaka talasi ba la pyniasoh lang ha Attari yn khang noh mardor bad ia kito kiba dang shu iaid lait ia u pud u sam jong ka Attari ryngkat bad ki jingpynskhem kiba biang la bthah ban mih lyngba kajuh shwa ka 1 tarik u Naitung, 2025.
Mynta yn nym shah ïa kino kino ki nong Pakistan ban leit sha India lyngba ka skhim SAARC visa Exemption. Kino kino ki nong Pakistan kiba don mynta ha India hapoh ka SPES visa ki don 48 kynta ban mih na India.