Shillong, 4 Jylliew – U Superintendent of Police jong ka East Khasi Hills, u Vivek Syiem, u la pyntip ba ki bor pulit ki la ioh pdiang ïa ka jain slap kaba don ki dak ha ka jaka kaba don hajan 5 metre na ka surok Mawkma ha Sohra. Hynrei u la ong ba dang kham kloi ban pynshisha lano ka dei jong ka Sonam Raghuvanshi ne em.
“Ka dei ka jain slap kaba la dap da ka um. Don ki dak ha ka, hynrei ngim pat lah ban pynshisha lano ki dei ki dak snam – ka dei tang ka forensik kaba lah ban pynshai,” ong u Syiem.
U la ong ruh ba ki dang wad bniah ban ïanujor ïa kane ka jain slap bad ka jingthmu ban tip lano ka dei ka jain kaba la shem ha ki video kiba don la dep ban ioh. “Ka size ruh ka long 3XL, kumta ngi dang peit bniah,” u bynrap.
Ha kaba ïadei bad ka jingthwet, u Syiem u la pyntip ba ki kynhun ki la shongshit ban khynra ïa ka thlaw ha thain Wei Sawdong ha ka sngi Balang, hynrei ka slap kaba jur ka la buh jingeh. Ka jingthwet kan dang bteng ha ki jaka ba marjan.
“Ki don shibun ki kynhun kiba ïashim bynta – palat 50-60 ngut na ka NDRF, SDRF, Fire and Emergency Services, SIT, SOT, bad ruh ki nongwan kyrshan na ka shnong,” u la ong.
Haba kylli halor ka jingpyndonkam drone, u Syiem u la ong ba ka jingkyrhai slap ka la wanrah jingeh, hynrei haba ka lyer ka la kham jem, la lah ban pyndonkam da ka NESAC drone. “Ka drone ka la ïarap ruh ban lap ïa ka metiap jong u riewlum. To ngin duwai ba ka lyer kan jem,” u ong.
U Syiem u la kyntu ruh ïa ki paidbah ban nym shu ngeit ïa ki khubor bym shisha. “Ka SIT ka la dep ban thaw, bad ngin leit shaphrang katkum ki sakhi, ki kyndon, bad ka jinglap na ka jaka jingjia,” u la ong.
U la ong ruh ba ka post-mortem jong u Raja Raghuvanshi ka la dep, hynrei ka khubor kaba pura ka dang ap.
Ka kynhun NDRF kan bteng biang ïa ka jingthwet ïa ka Sonam Raghuvanshi lashai, hadien ba ka slap kaba jur bad ka jingbym shai ka khmat ka la pynsangeh shwa ïa ka jingtrei ha ka sngi Balang. Ha kane ka jingleit wad, ki la hiar shaduh 700 phut sha Arliang gorge ha Wei Sawdong – ka jaka ba la lap ïa ka met jong u Raja mynshwa.