Ka Hynniewtrep Achik National Movement (HANM) kala dawa na u Myntri ka tnat Bording u AT Mondal ban tuklar pynbha ïa ka 132 KV Substation ba don ha Nongpoh, Ri Bhoi District.
U president HANM Ri-bhoi District HANM u samla Donroi Ksiar u la pynpaw ba ka Ri-Bhoi ka la ioh District ba pura haka 4 tarik Jylliew 1992 ka thain ka nangroi ka jingdon briew kaba la pynlong ban nym dap ka jingdonkam Bording.
Ha ka memorandum ka HANM ka la pyntip, ka thaiñ Nongpoh ka khmih lynti ban ioh Bording na ka Single 33 KV Umsning-Jyntru kaba kam lah ban pynbit pynbiang ïa ki jingdonkam Bording hapoh ka thaiñ kaba don palat 25,000 tylli ki longing ha ki palat 400 tylli ki shnong.
Haba kren u samla DonroiKsiar u la pynpaw “Watla ka Ri-bhoi District ka dei ka thaiñ ba paw khmat ban pynmih Bording hynrei ka thaiñ ka dang don hapdeng ka jingkyrduh Bording namar bun ki daw bad kane ka pynlong iaki kam pynroi ban sahteng”
Ka HANM ka dawa na u Myntri ka tnat Bording ban thaw 132 KV Power Sub-station hapoh ka District, ban pynkhlaiñ ïa ka tnat MeECL da ka ba bthah ïa ki Ophisar ban pynkhlaiñ ka rukom sam Bording, ban pyntreikam da ka Grievance Redressal ban plie lad ïa ki paitbah ban ujor lada thut ka jingioh Bording.