Shillong, 7 Kyllalyngkot 2026:
Ka Meghalaya State Council of Contractors & Suppliers Welfare Association (MSCCSWA) ka la aiti ïa ka memorandum sha u Executive Engineer jong ka Health & Engineering Wings Department, Sorkar Meghalaya, da kaba dawa ïa ka jingïasam kam kaba paidbah sha ki contractor shnong lyngba ka jingphiah Tender katkum ki District.
Ka synjuk, kaba la soi da u President Bah Banshai Marbaniang bad u Secretary Bah Rofello Khongwar, ka la pynpaw ïa ka jingbitar halor ka jingpyrshah ïa ki contractor Hynniewtrep shnong, da kaba ong ba watla la khot Tender bun sien hynrei ym pat don kam ba la sam sha ki contractor shnong.
Ka MSCCSWA ka la dawa ïa ka jingkhuid jingmut ha ka jingïasam kam, ka jingtohkit ïa ki Tender ba la pynmih ha kine ki ar snem ba la dep, bad ka jingïada ïa ka hok jingïim bad kamai jakpoh jong ki trai ri trai muluk. Ka synjuk ka la maham ba kan shim ïa ki lynti aiñ bad jingïakhih paidbah lada ym shimkhia ïa kane ka kam.