Mawkyrwat, Jymmang 24: U Myntri Rangbah ka Jylla Conrad K Sangma ha ka 23 tarik u Kyllalyngkot u la pynshitom ïa uwei u ophisar ha khmat ki paidbah namar ba um kheiñ snep ïa ki jingdonkam jong ki briew watla la pynmih ïa ki jingujor
Ka jingpynshitom u Myntri Rangbah ia uwei u Ophisar hakhmat ki paidbah ka dei ki nongshong shnong jong ka Ranikor bad ki jaka ba marjan ki la leit ban sngap bad sakhi ïa Jingwan Myntri Rangbah ka Jylla Conrad K Sangma ha Ranikor.
U ophisar ha khmat ki paidbah khot u Myntri Rangbah ban pynshai balei khlem leh ia ka jijgujor ki paid bah.
Na ka liang u myntri rangbahu la sngewsih haba kawei ka kynthei ka la pynpaw ia ka mat jong ka jingshah thombor man ka por ha ki hati khlaw ia ki jingthung jingtep bad ki iing ki sem ha ka thain Ranikor kaba la iaid mynta la ar snem.
Haba katei ka longkmie kaba na ka shnong Mawpyllun ka la kyntu ia u CM ban tuklar ia katei ka kam, uwei u ophisar u la pyntip sha u CM ba ki la thaw ia ka kynhun ban iarap kloi bad tang shu ioh jingtip shaphang ka jingshah thombor jong ki hati ki pyntrei noh mardor ia katei ka kynhun. Hynrei katei ka longkmie ka la pyntip sha u CM ba bunsien ka jingpyntip ka long kaba slem bha bad ynda la poi ka kynhun pyntip kloi ki ju dih kyiad.
U Sangma u la khot ia u ophisar ka Nongstoin Range sha madan bad u la sneng ia u. “Hato phi phah ia ki briew kiba la buaid sha ki? Kane kam long kaba lah ban pdiang satia. Ka jingpynslem ka dei ka mat kaba pher, hynrei ka jingleit buaid ka long kaei kaei kaba ngam lah ban pdiang.
Ka don ka por ban dih bad ka don ka por ban trei. Ka dei ka kam jong ka jingim bad ka jingiap, bad dei ban leh da kaba tyngeh pyrshah ia kito ki briew la ki long mano mano ruh”, u la ong.
Haba kiwei pat ki briew ki la ong ba ki hati khlaw ki la sahkut ha katei ka jaka la palat ar snem, u CM u la bthah ia ki ophisar ba rangbah ba kin ai ka jingkyrshan ia ka kynhun jong ka Nongstoin khnang ba kin lah ban pyniaid ia ka jinglong jingman bad ban shimkhia ia ki briew kiba tieng ia ki ki jingim.
Kiwei pat ki mat kiba la wanrah da ki nongshong shnong ha ka jingialang paidbah ha ka kyrdan block hapoh ka CM-Connect kaba la long ha Pamdaba Playground ha Ranikor, South West Khasi Hills, ki kynthup ia ka jingpyniasoh ia ki surok, ka jingpyniasoh um, ka jingeh ha ka bording, ka jingduna ka jingpynmih mar rep, ka kam jngohkai bad ka jingeh ha ka liang ka Aadhaar.
Da kaba shim kabu ia kane ka prokram, uwei u nongshong shnong na Nongnah u la kylli jingkylli ia ka sienjam ba la shim da ka sorkar na ka bynta ban kyntiew ia ka kam jngohkai pyrthei ha Nongnah. Ha ka jubab jong u, u Sangma u la ong ba ka sorkar jylla kan pynher ia ka tender kaba T.30 klur na ka bynta ban shna ia ka jaka jngohkai pyrthei ha Nongnah, nalor ba kan sanction pisa na ka bynta ban shna ia ka surok approach bad ka jaka peitkai ha katei ka jaka. U CM u la bthah ruh ia u deputy commissioner ka South West Khasi Hills ban pynrung ia ki samla bad ki longkmie ha ka kam jngohkai pyrthei na ka bynta ban ioh kam ioh jam.
U Sangma u la kam ba kan dei ka projek kaba heh bha namar ba katei ka surok ka hap ban iaid lyngba ia ka wah Rilang, bad u la kular ia ki paidbah ba un sa peit bniah ia katei ka kam. Ki nongrep na ki shnong bapher bapher ha kajuh ka por ki la ïasam ïa ki khana jong ki halor ka jingduna ka jingmih mar rep bad ki la pan jingïarap na u CM, ha kaba u la ong ba ki nongrep ki lah ban shim kabu ïa ki jingthmu kum ka CM Farm Plus bad ïoh jingkyrshan. Ha kane ka prokram la wan ban ïashimbynta ka myntri ka koit ka khiah ka Kong Ampareen Lyngdoh, ki MLA u bah Pius Marwein bad u bah Renikton Lyngdoh Tongkhar, u symbud myntri rangbah u Sampath Kumar bad kiwei kiwei.