Shillong, 5 Jylliew:
U Nongïalam ka Liang Pyrshah, Dr. Mukul Sangma, ula ïathuh sha ki lad pathai khubor ha ka sngi Palei ban pynshai bad ai jingsneng halor ka Meghalaya Residents Safety and Security Act (MRSSA). U la kdew ba kane ka ain la pynlong ban ïoh ïa ka jingsngew shngaiñ bad ka jingshah sumar na ka bynta ki nongshong shnong jong ka jylla lyngba ka rukom treikam kaba la ai bor bad la buh ryntih.
U Dr. Sangma u la pynshai ba ka thong jong ka sorkar haba sdang ïa kane ka ain ka long ban thaw ka rukom pynshngaiñ ka jong ka jylla, kaba lah ban treikam hi dalade. Ka MRSSA ka dei ka jingpynkhreh kaba bniah bad ka la sdang treikam ha ki katto katne ki thanat pulit ha ki bynta shathie jong ka jylla. Kane kam dei tang ka jingthmu beit-beit, hynrei ka dei ka jingpynkhreh ban ïarap ïa ki bor synshar bad ki bor pulit ban trei bha.
U la pynpaw ïa ka jingsngewkhia ba haduh mynta ruh, ki thanat pulit kim pat don satia ïa ki CCTV lane ki tiar ban peit pyrman. U la ong, “Haduh mynta, bun ki thanat pulit kim pat lah ban ioh ïa kane ka jingdon jingem. Kane ka dei kaei kaba ngi la pyrshang ban leh ha ka por ba ngi bat ïa ka synshar. Kane ka dei ka jingpynshongnongrim kaba donkam bha.”
U Dr. Sangma u la ong ba ka MRSSA kam dei tang ka jingïoh jingtip shaphang ki briew, hynrei ka long ka rukom pynkhreh ban tip kloi, ban peit pyrman bad ban ai jingïarap kloi haba don kino kino ki jingjia. “To da tharai, lada ngi la pyntreikam lut ïa kane ka ain – drones, jingtip ha ka por jong ka jingjia, jinglum jingtip ha ka rukom kaba ryntih – ngi lah ban ai jingïarap bad leh eiei kloi bha,” u la bynrap.
U la ong ruh ba ka MRSSA ka long kaba la buh ha ka aiñ bad ka la wan lyngba ka jingpynbeit bniah, ka jingkren sngewthuh lang bad ka jingpynshong nongrim kaba tyngeh. “Kane ka aiñ ym dei kaba la shim ba suk hynrei kaba la pynlong da ki mynsiem ba don jingstad ban peit ïa ka lawei jong ka jylla,” u la ong.
Ha kaba khatduh, u Dr. Sangma u la pynpaw ba wat ha ki jylla kiba khlem don jingma na ki lehnoh ruh, ka long kaba donkam ban don ïa ki ain pynshngaiñ kum ka MRSSA. “Ka jingpynkhreh kam dei tang ban shaniah ha ki jingma ba paw pyrshah – hynrei ban long kiba lah ban peit ïa kiei kiei kiba lah ban wan ha ka lawei,” u la ong ban pynkut.