Jowai -Ka Employment Commission Jaiñtia National Council (JNC) ka la pyntreikam ia ka Save Jaiñtia Mission ban leit khynra myn ka Sngi ka 2 Tarik u Iaiong sha kawei na ki karkhana dewbilat kata ka Amrit Cement ban khynra labour licence bad trading licence ia ki briew kiba nabar jylla.
Ha jingleit khynra ka Commission la ialam khmat da u bah Ency Shadap Chairman ka Employment Commission badu bah Mebanteilang Sukhlaiñ Secretary ka Commission ryngkat ka jingiasynran lang ki nongialam ka CEC ban khynra ia ki kot ki sla jong ki briew kiba nabar jylla bad ha kane ka jingkhynra la lap ba da ki phew phew ngut ki bym don ia ki kot ki sla ba biang bad kumta ka Commission da kawei ka sur ka la beh ia ki mardor bad la maham ruh ia ki company ba kim dei satia ban wanlam briew nabar khlem ki kot ki sla kiba biang bad ba ym dei ruh ban thung ia ki nongtrei katba ki briew ki jong ngi ki dang lah ban trei khamtam ha ka kam labour.
Haba ai jingkren u General Secretary JNC-CEC bah Wanshwa Suting u la ong ba ia ki bym biang ki kot ki sla dei ban beh noh mar mar bad ym dei ruh ban wanrah briew nabar katba ki briew trai jaka trai puta, ki dang lah ban trei ia ka kam bad u la ong shuh ba ka seng kan nym shong kli kti katba ka jingdawa jong ka kam pat seisoh bad kan sa leit ruh sha kiwei pat ki kharkhana ban leh ia ka juh.