Shillong, 12 tarik Kyllalyngkot 2026 : U Samuel Hashah, Working President ka North East Kickboxing Association, u la kren sha ki lad pathai khubor ha Shillong Press Club hynne ka sngi Nyngkong bad pyntip paidbah ba ka 4th North East Kickboxing Championship 2026 kan long naduh 29 haduh 31 tarik Kyllalyngkot 2026 ha Shillong. Ia kane ka lympung yn pynlong da ka All Meghalaya Kickboxing Association.
Ia ka jingïakob yn pynlong ha Meghalaya Bharat Scouts and Guides Hall, Shillong, bad kan kynthup ia ki kyrdan bapher bapher kata Tiny Tots, Sub-Junior, Junior bad Senior, na bynta shynrang bad kynthei.
U Hashah u la ong ba ki nongïalehkai kickboxing na kylleng ki jylla ka Thaiñ Shatei Lam Mihngi — Assam, Arunachal Pradesh, Meghalaya, Manipur, Mizoram, Nagaland, Sikkim bad Tripura — kin wan ban ïashim bynta ha kane ka jingïakob. U la pyntip ruh ba la dep ioh pdiang bun tylli ki jingpynshisha na ki jylla bapher bapher bad ki nongpynïaid ki khmih lynti ban don ym duna ïa 600 ngut ki nongïashim bynta.
U la ong ba kane ka lympung jingïalehkai ka long ka rynsan kaba kongsan bha ban ithuh bad pynroi ïa ki samla nongïalehkai ba dang mih na kane ka thaiñ. Ha kane ka championship yn don bun jait jingïalehkai kum ka point fight, kick light bad full-contact bouts.
Shuh shuh, u Hashah u la ong ba kane ka championship kan long ruh ka rynsan jied na bynta ki jingïalehkai kyrdan pyrthei, kynthup ïa ka international kickboxing championship kaban long ha Bali, Indonesia, ha u bnai Rymphang 2026. Kito kiba leh bha ha kane ka lympung kin ioh lad ban mihkhmat sha ki jingïalehkai pyrthei.
Da kaba ban jur ïa ka jingdonkam ka jingïatylli hapdeng ki nongïalehkai ka Thaiñ Shatei Lam Mihngi, u Hashah u la ong ba kane ka championship ka thmu ban pynkhlain ïa ka jingïatylli, jingïasngewbha bad jingïatreilang hapdeng ki kickboxer na ki jylla bapher bapher. U la ong ruh ba watla ym pat don sponsar kiba heh, hynrei u sngewnguh ïa ki paralok bad ki well-wishers kiba la kyrshan ïa kane ka jingpyrshang.
Ha kaba kut, u la kyrpad ïa ka sorkar jylla, ki sponsar bad ïa ki paidbah ba sngewtynnad ïa ki jingïalehkai ba kin kyrshan lang ban pynlong ïa kane ka lympung jingïalehkai kaba jop bad ban kyntiew ïa ka jingïalehkai kickboxing bad ki jingïalehkai jingïaleh jingïakhun ha ka thaiñ.
