Shillong, Naitung 29: U Myntri rangbah ka jylla Meghalaya u Conrad K Sangma bad u myntri rangbah ka jylla Assam u Himanta Biswa Sarma Ki sa iakynduh biang shen ban iakren jong ka bynta kaba ar jong ka jingiakren pud ban pynbeit ia ki 6 tylli ki bynta kiba dang sah jong ka jingiapher jingmut ha ka 2 tarik u Jylliew iathuh u Chief Secretary u bah DP Wahlang sha ki lad pathai khubor myn sngi Balang hadien ka jingialang ba la long ha Secretariat.
U CS u la ong, “Ngi dang ïai bteng ïa ka jingïakren bad ka jingïalang jong ka kyrdan myntri rangbah ban wan kan long ha ka 2 tarik u Jylliew.
U bah Wahlang pynban u la ong ba ki lai tylli ki regional committee kim pat lah ban ai ia ka kaiphod na ka bynta ka phase-II namar “ka long kaba eh khyndiat haba phai sha ka Block I, Block II bad Langpih.
“Ki (ki komiti thaiñ) ki donkam kham bun ka por bad ngi la ai por ïa ki hynrei ka jingïakren ha ka kyrdan jong u CM ban wan ban pynbeit ïa baroh ki jingïapher, ki mat kiba ngi don baroh ar na ka bynta ka phase I bad II yn pynlong ha ka 2 tarik u Ïaïong ha Guwahati,” u la bynrap.
Halor ka jingdawa ban pynkynriah biang ïa ka Block I & II sha ka Jylla Meghalaya, u symbud myntri rangbah u la ong, “Kata baroh kan long shi bynta jong ka agenda ba ngin sa ïakren bad ka Assam. Ngam lah ban ong eiei ha ka kyrdan shimet mynta hynrei ynda ngi la don ïa ki jingïalang ha ka kyrdan CM kumjuh ruh ha ka kyrdan official kine ki dei ki mat kiba ngin sa ïakren bad bishar bniah.