Ka KHADC ka don ka bynta kaba khraw ban iada ia ka khaii bad ka kamai kajih ki riewlum trai ri da kaba tehlakam ia ka jingioh khaii laitlan ki Non-Tribal. Ka KHADC kam shym la pynbha ia ka Trade Rules la slem bah bad kane ka la buh jingeh ia ka Trade Department jong ka Council.
Kumta, ka EC jong ka KHADC hapoh ka jinglamkhmat jong ka UDP ha ka por ba long EM u Bah Paul lyngdoh ia ka Trade ka la pynthymmai ia ki Trade Rules bad la notify ia kane ha u snem 2019. La pynkiew ia ka bai laisen bad la buh ia ki kyndon kiba kham eh ban ioh Trade Licence da ki Non- Tribal.
Ka EC jong ka KHADC hapoh ka jingialam jong ka UDP ka la pyrkhing tyngeh ban ai laisen bad ngi kynmaw ba la don ki MLA bad Minister kiba leit hi da lade ban ia kren ai trading licence da lade ha KHADC ka ba dei ka jingjia ka bym pat ju jia koit mynno mynno. Ym tang katta lah don ruh kiba ujor sha duh sha ka ophis u Prime Minister ka Ri India (PMO). Ka PMO ka la thoh sha ka EC halor kane ka bynta bad ka Trade Department ka la pynshai.Ha kito ki por ka la don ruh ka jingbym ai laisen sha ki Non-tribal ha majai bad da ki spah ngut ki la ujor sha Iing Kashari ka Meghalaya High court.
Ka Trade Department ka la thoh ruh sha ki bor ka sorkat jylla ban nym shah ia ki Non-Tribal ban ioh apply ia ki kam contract/supply khlem ka Trading Licence.
Ka kam ka kren kham jam ban ia ka ktien bad kumta kine ki sienjam jong ka KHADC ha ka por ba bat ka UDP ia ka Trade department ki la pakhang shikatdei eh ia ka jingioh khaii pateng laitlan da ki barjylla ha u pud u sam jong ka KHADC.