Hadien ba ka HYC Mawthawpdah Area Unit hapoh ka jingialam u samla Boneyface Shangpliang ka la leit ia kynduh ia ka Dr Mazel Ampareen Lyngdoh ha Shillong ha ka 13 tarik u Jylliew 2024 halor ka jingduna ki doctor bad ki nurse hapoh ka PHC Mawthawpdah .
ka Dr Mazel Ampareen Lyngdoh Myntri badei peit ia ka tnat ka koit ka khiah jong ka sorkar jylla khlem da pynslem da ka jingsngewkhia mynta ka sngi ka 26 tarik u Jylliew 2024 ka la leit jurip dalade hi ia ka PHC ha Mawthawpdah bad ka Sub Centre ha Shngimawlein ban sakhi da la ki jong ki khamt ia ki jingduna hapoh kitei ki jaka ai jingsumar.
Ha kane ka sngi jurip ia ka PHC la ïadonlang u bah Renikton Lyngdoh Tongkhar MLA ka Mawkyrwat Constituency, bah Carness Sohshang, MDC, bah Kit borlang Nongrem , President NPYF, u Doctor ki Nurse , ki dkhot ka HYC Mawthawpdah Area Unit bad ki paidbah nongshong shnong
Ha katei ka sngi na ka liang ka Synjuk Ki Rangbha Shnong Area Mawthawpdah lem ka Seng Samla Shnong Shilliang Um ki la ioh ban ai ia ka dorkhas ha ka kong Ampareen Lyngdoh kata ban pynbun shuh shuh ia ki doctor , ki nurse bad kiwei kiwei ki nongtrei , ban Mamamot noh ia ka building bad ban pynbiang bording ilektrik noh bad ka um ha baroh ki Sub Centre kiba hap hapoh katei ka PHC .
Ha kajuh ka por ki la buh ka jingkyrpad ia kong Amapareen kaba peit ruh ia ka tnat ka rep ka riang ba kan thawlad lem ban kyntiew ia ka ia ka rep ka riang bad ka kam ri jingri hapoh katei ka dong ka thaiñ.