Hato don dang mrad khlaw seh ha Meghalaya State Zoo ba leit plie u Myntri Rangbah

Shillong, 27 Naiwieng 2024: U myntri rangbah ka jylla u Conrad K Sangma mynta ka sngi u la plie paidbah ia ka bynta ba nyngkong jong ka Meghalaya Biological Park ha Untrew, Ri Bhoi District.
Ha kane ka sngi la donlang ruh u myntri ka tnad ri mrad u bah A L Hek u MLA u Bah Celestine Lyngdoh u nongai buit rangbah u bah Lakhmen Rymbui bad u symbud myntri rangbah u bah D P Wahlang.
Haba kren ha kane ka jingplie paidbah, u Myntri Rangbah ka Jylla, Conrad K Sangma haba pynpaw ïa ka jingkmen ban pyndep ïa kane ka projek kaba la sahteng la slem bha u la ong, “Ka ai ka jingkmen bad jingsngewhun kaba khraw ïa nga ban plie ïa ka 1st Phase jong ka Meghalaya Biological Park kaba la shim por jan 24 snem ban pyndep naduh ba la sdang ïa ka . namar ki jingeh bapher bapher bad watla ngi dang pynbna mynta ka sngi ka donkam shibun ban leh ban pynlong ia kane ka jaka kaba shlur bad kaba treikam pura.”
U la bynrap ruh ba ka jingpyndep ïa kane ka projek kaba la sahteng la slem bha ka dei ka testament bad ka jingkular jong ka sorkar ban rah ïa ka jylla shakhmat. U la pyntip ruh ba watla bun ki bynta jong ka Biological Park, kum ki jaka die tiket, ki jaka bam, ki dukan die jingkynmaw bad ki jaka kynroh ki dang donkam ban pyndep hynrei ka long kaba kongsan ban sdang ïa ka bad bynrap, “Kane ka Biological Park ka lah ban long ka jaka ym tang na ka bynta ka jinglehkai bad pynbyrngia .
Ka dei ka jingthmu ba kongsan jong ka sorkar ban buh ia ka jingpyniaid beit ia ka mariang bad ki projek kum kine ki ailad ia ngi ban ai jaka ia ki mrad kiba la pyllait im ne ki bym lah ban leit phai biang sha la ka jong ka jaka shong jaka sah.”,
U la ong ruh ba ka dei ka jingthmu jong ka sorkar ban pynim biang ia ki projek kiba rim kiba la sahkut. U Myntri Rangbah ka Jylla u la kren jrong ruh halor ka jingdonkam ban lum jingtip, ban jurip bad ban wad bniah khnang ban don ka jingkhein kaba thikna ia baroh ar ki jingthung jingtep bad ki mrad ki mreng man ka por.
U la kdew ba kane ka jingtip bad jingtip ka lah ban iarap ha ki lad pynbeit ban tehlakam ia ka jingialeh hapdeng u briew bad u mrad. “Ka jingdon ia ka jingjurip bad ka jingbuh jingtip da kaba pyndonkam ia ka teknoloji halor ki jingthung jingtep jong ka jylla kan iarap ban pynneh pynsah bad iada ia ka mariang bad ki mrad ki mreng ha ka rukom kaba paka”, u la ong.
Ha kaba pynkut, u myntri rangbah u la ong ba ka sorkar ka dang trei ia ki lad ki lynti ban pynshlur ia ki nongshong shnong ha ka liang ka pisa ha kine ki jaka kiba kongsan namar kane ka kylla long ruh ka lad jngohkai pyrthei na ka bynta ki nongieid ia ka mariang bad ka pynlong ia ka jingjop na ka bynta baroh arliang mamla.
Ha kane ka sngi plie paidbah la don lang ruh u ma S. M. Sahai uba dei u nongsumar khlaw ka IFS (Wildlife & Biodiversity) & Chief Wildlife Warden, u R. S. U P. K. Agrahari, U heh ophisar jong ka IFS, ka seng pyntreikam ia ka projek jong ka Meghalaya Zoo.