DECEMBER, 8 , 2025 : Kat kum ki jingtip la iathuh ba ka ri Pakistan, ka la tyrwa na ka United Kingdom ba kan shim biang ia ki dkhot jong ka kynhun runar jong ka Rochdale, kiba la shah rai pynrem, lada ka UK, kan phah biang ia kitei ki arngut ki nongialeh pyrshah sain pyrthei.
Ïa katei ka jingtyrwa la ïakren ha ka jingïalang kaba kyrpang hapdeng u Mohsin Naqvi, myntri kam pohïing jong ka Pakistan bad ka Jane Marriott, High Commissioner jong ka UK.
Da ki snem, ka UK ka la ïaleh ban beh noh ïa ki katto katne ngut ki dkhot jong ka kynhun runar kiba la shah rai pynrem halor ka jingshah lehbeiñ bad khaii briew. Watla la weng noh ïa ka jinglong nongshong shnong jong ki na ka ri Bilat ha u snem 2018, hynrei ka Pakistan ka la kyntait ban pdiang ïa kiba bun kiba la iehnoh ïa ka jinglong nongshong shnong jong ki na Pakistan, kaba la pynlong ïa ki ban shah pynthut ha ka liang ka aiñ.
Lada mynjur, kane ka jingiateh kan long ka jingkylla kaba khraw bad ka jingkyntiew ia ka sain pyrthei hapdeng ka London bad ka islamabad.
Ha kajuh ka por, ka Pakistan ka la dawa ban ioh ban tohkit ïa u Akbar bad u Raja, bad baroh arngut na ki kila kynthoh tyngeh ia ka pakistan halor ka jingpynlong shipai ia ka ri. Katkum ka jingong jong ka sorkar Pakistan, kitei ki arngut ki shah kynnoh ba kila pynsaphriang ia ka jingpynbna pyrshah ia ka sorkar katba ki dang sah ha UK. Baroh arngut na ki ki dei kiba la wad da ka sorkar Pakistan. Dei ban aiti noh mardor sha Pakistan”, la iathuh ba u Naqvi u la ong ha ka Marriott ha ka jingiakynduh.
Ka UK kam don ka jingiateh kaba biang bad ka Pakistan, bad ki iingbishar jong ka ri Bilat ki khanglad ia ki jingkyrpad ban pynphai ia ki briew kiba don ha ka jingma ban shah pynshitom beiñ.