Her Delhi u Bah Sanbor Shullai iakynduh ia u Union Minister Nitin Gadkari, ban pan jingdonkam flyover ha Shillong

Shillong, 19 tarik Kyllalyngkot 2026:
U MLA bad Cabinet Minister ka BJP u Bah Sanbor Shullai, ryngkat bad u State President ka BJP Meghalaya u Bah Rikman G. Momin bad ki heh nongialam ka seng, ha ka sngi Nyngkong ki la iakynduh ia u Union Minister ka tnad Road Transport bad Highways u Bah Nitin Gadkari, ban pynpaw paidbah ia ki jingeh bapher bapher kiba iadei bad ka kam pynroi surok ha jylla Meghalaya, khamtam ha nongbah Shillong.
Ha ka jingïakynduh, ki nongialam ka BJP ki la pyntip ia u Union Minister halor ka jingpynslem ban pyndep ia ka surok 4-lane naduh Umshyrpi haduh Sadew. Ki la pynpaw ruh ia ka jingeh jong ka drainage system hapoh ka Shillong Cantonment area, kaba la sah khlem pynbeit la bun snem namar ka jingbym shimkhia ka NHIDCL.
Nalor kane, ki la ban jur paidbah halor ka jingdonkam kyrkieh ban shna ia ka flyover naduh Barik sha Jhalupara Taxi Stand, khnang ban pynjem ia ka jingdheng kali bad ka jingdheng paidbah ha katei ka thaiñ.
U Union Minister u Bah Nitin Gadkari u la kular ban shimkhia ia kine ki mat bad ban iakren bad ka Ministry of Defence halor ka jingai jaka sha ka NHIDCL na bynta ka projek flyover. U la ai jingmut ruh ban thaw ia ka Infrastructure Development Committee khnang ban pynsted bad ban pyndep kloi ia ka projek flyover.
U Bah Sanbor Shullai u la pynpaw ia ka jingsngewnguh ia u Union Minister u Bah Nitin Gadkari na bynta ka jingai mynsiem bad ka jingpynkhreh ban shimkhia ia kine ki kam pynroi kiba donkam bha na bynta ki paidbah ka nongbah Shillong.