Shillong, 2 Jylliew 2025 — U Myntri Rangbah ka jylla Meghalaya, u Conrad K. Sangma, ula leit jurip mynta ka sngi ïa ka SSA Polo Ground Phutbol 1st Division, ban peit bniah ïa ki jingpynkhreh na ka bynta ka samoi ialehkai football kaba dang sahteng. La synran lang da u Bah Banteidor Lyngdoh, President ka Shillong Sports Association (SSA) uba dei ruh u MLA, u Bah Hamletson Dohling, President ka Meghalaya Football Association (MFA), ki heh sorkar na ka Tnad Sports bad ki dkhot ka SSA.
Haba kren sha ki lad pathai khubor kiba la khot kyrpang da ka SSA, u Conrad ula ong ba ka jingtrei ka dang ïaid shaphrang hynrei don ka jingpynslem ha ka jingïarap.
“Phi ïohi ba ka jingïai trei ka dang ïaid, hynrei ka long ruh ba don ka jingpynslem. Don bun ki jingeh, hynrei ngi dang pyrshang ban pynbeit bad ban pyndep noh kloi katba lah,” la ong u Conrad.
Ula kdew ruh ïa ka jingkongsan jong kane ka madan ha ka liang ka football ha sor Shillong bad ha Jylla, kaba ju pynlong ïa ki jingïakhun ba kham heh ha ka samoi ialehkai.
Haba ïakren bad ki dkhot ka SSA, u Conrad ula kylli ïa ki jingdonkam jong ki na ka liang ka Sorkar bad ula kular ban pynpoi sha ki tnad treikam kiba dei peit. U la pynpaw ruh ba donkam ban pynbha shuh shuh ïa kane ka madan, khamtam haba ïa peit sha ka National Games kaba dang sahteng.
“Ka lah ruh ban long ba katto katne ki jingïakhun jong ka National Games lah ban pynlong hangne,” la bynrap u Conrad.
U la pyntip ruh ba hadien kumba 7 snem kaba kane ka madan ym shym la pyndonkam, ka long tang ha u 2022–2023 ba la lah ban sdang biang ïa ki kam shna.
“Ka jingeh ka long ruh namar kane kam dei ka madan phlang jyrngam, hynrei ka dei ka madan ktieh , te ka wanrah bun ki jingeh. Hynrei ngi pyrshang ban wad ïa ki lad ban pynbeit,” la pynkut u Conrad K. Sangma.