Shillong, Iaiong 12: Ka Tnad Election Commision ka India ka la sngewkhia ia ka jinglong jingman ha JYlla Iathuh u Chief Electoral Officer (CEO) Dr BDR Tiwari hynne ka sngi Thohdieng, sha ki lad pathai khubor.
U Tiwari u Iathuh ki jingjia ha kine ki khyndiat sngi ki dei ki bym ju jia koit ha ka por elekshon ha ka jylla.
Hynrei ka Election Commission ka iengskhem ha kaban pynthikna ba ka elekshon MP Lok Sabha kan long kaba laitluid, kaba khuid ba suba bad kaba jai jai.
Halor kitei ki jingjia u Tiwari u la dep lum ia ka jingialang ia ki nongialam seng saiñ pyrthei, u ong ba kila don ki jingsngewkhia kiba la pynpaw da ki seng saiñ pyrthei.
Shuh shuh u Tiwari u kyntu ia ki seng saiñ pyrthei) ban iatreilang bad kin pyrshang katba lah ban pynneh iaka shongsuk shongsaiñ bad ha kajuh ka por ban ai ka jingiatreilang bad ki bor aiñ ha ka jylla”
Ka EC ka dang peit bniah bha halor kane ka bynta , ba ki don ka jingsngewkhia ha kaba iadei bad ka jingpynneh ia ka shongsuk shongsaiñ ha kane ka elekshon ban wan.
Ha kaba iadei bad ka jingpynkheiñ ia ka Model Code of Conduct, u CEO ula pyntip ba la dep ban ai Show Cause Notice ia ki katto katne ngut ki nongialam bad nalor kane ki kynhun kiba kynthup ia ka Flying Squad bad ki Pulit ki don ha ki lyngkha treikam bad la ring video ruh ia baroh ki jingialang jong ki seng saiñ pyrthei bad la pynjur ruh ia ka jingpahara ban pynneh ia ka shongsuk shongsaiñ bad ban tehlakam ban ym mih kino kino ki jingjia ki bym sngewtynnad.
Ula ong, ba ka Election Commission kala khmih bad peitngor bniah bha ia ki Social Media bad lada ka ioh jingtip eiei kan leh mardor ia kaba donkam.
U CEO ula pyntip ruh ba la dep ban ithuh ia palat 400 tylli ki jaka thep vote kum ki jaka kiba don jingma ne kiba lah ban mih ka huri hura.
Nalor kane, ula pyntip ba ki paidbha kila mih shakhmat ha kaban iashimbynta ha ka jingthep vote na ka iing kaba ki shong ki sah bad lyngba ka Postal Ballot.