Shillong – Ka Jylla Meghalaya ka ioh haduh 63 billion cubic liter ka um ha ka shisnem tang na u slap, kaba dei ka jingioh ba hehbha hynrei, ka Sorkar kala lah pat ban pynlang tang 1 billion cubic liter na kane ka umslap iaThuh u Myntri Rangbah ka Jylla Conrad K Sangma ha jingialang Meghalaya Water Smart Kid Campaign, ha Shillong myn 8 tarik u Naiwieng.
Haduh 31 billion cubic liter kala tuid sha Bangladesh bad 31 billion cubic liter kala tuid sha Assam pynsngew u Myntri Rangbah wat lada ka Meghalaya ka dei kawei na ki jaka ba jur bha u slap ha pyrthei. Ka sienjam bala shim lyngba ka Jal Jeevan Mission (JJM) ban pynsngewthuh ia ki khynnah halor ka jingkongsan ban pynlang/tyngkai ia ka um.
Ha jingialang ba la shim bynta da bun ngut ki khynnah bad ki paidbah ka Sorkar Jylla ka bsut bun ki sienjam, kiba la kyrdan da ki jingbei pisa ba wan nabar (Externally aided project (EAP) bad ka Ministry of Jal Shakti ka Sorkar India, bynrap u Conrad.
Palat 1000 tylli ki top um la shna ha kylleng ki jaka ka Jylla khnang ban lah pynlang ia ka um bad nang pynbun ia ka um ha ka mei ramew lyngba ki project bapher bapher ka sorkar ka la pyrshang kat kaba lah ban tyngkai ia ka um namar ka long kaba kongsan ban pynthikna ia ka jingneh bad jingpynim pat ia ki tyllong um” ula ong.
Ka jingpynbiang song pisa da ka tnad Public Health Engineering ban ooh um na ka JJM bad EAP, kaba la jan kot ia ka T.8000 klur.
U Conrad K Sàngma u pyntip ba hapoh ka JJM, ka Jylla kala ioh ia ka khusnam kum ka Jylla ba pyntreikam bha (best performer) da ka Ministry ka Jal Shakri nalor ka jingioh ia ki song pisa. U pyntip ba ka Jylla kala pyndep palat 4 lak ki longiing ha ka jingpynioh kor um hapoh Iing bad hapoh u Lber 2024, ka thong ban pyndep ka long 6 lak ki longiing.
Ha kane ka jingialang, u Myntri Rangbah ka Jylla bad u Myntri ka Tnad PHE Marcuise Marak, kila aiti ruh ia ka khusnam Water Guardian halor ka jingpyrshang ban iada bad tyngkai ia ki tyllong um.
Ia kane ka khusnam la ai sha ka shnong Lumshyiap bad ka Water Sanitation Community ka Ri Bhoi District, ka Shnong Darechikgre bad ka Water Sanitation Community ka West Garo Hills District lem bad ka shnong Dura Kantragre bad ka Water Sanitation Community ka West Garo Hills District.