Jar jar leit ka EC u Bah Shemborlang Rynjah ban iakynduh ia u Lat halor ki jingeh ka Council.

Shillong, Naitung 02, 2025 : U Bah Shemborlang Rynjah, u CEM ba la shah jied thymmai ha KHADC, ha ryngkat kiwei pat ki nongsynshar ba la jied thymmai, u Winston Tony Lyngdoh, ka kong Aibandaplin F. Lyngdoh Nonglait, ka Kong Deiti H. Majaw u bah Powell Sohkhlet u bah Pynkhrawboklin Kharjahrin, u bah Isynei Hinge lem bad ki MDC jong ki, ki la leit jngoh ia u Lat ka Jylla u C. H. Vijayashankar, ha Raj Bhavan myn 2 tark u Jymmang. Na ka liang Lat u la pdiang sngewbha ia ki ha ka rukom tynrai da kaba ai khublei ia ki da ka Khasi Ryndia.
Ha kane ka jingïakynduh, u Lat u la ai khublei ïa u bah Rynjah bad ïa ki Executive Members kiba la shimti ïa ka kam bad u la pynsngew ruh ïa ka jingkitbok kitrwiang na ka bynta ka jinglong jingman jong ki.
Ki Executive Member ki la pynshai ha u Lat ka jylla halor ka rukom treikam jong ka District Council. U Lat u la ban jur ia ka jingdonkam ban pynkhlain ia ka jingsynshar ba shapoh, ban pynneh pynsah ia ki tnat treikam tynrai, bad ban kyntiew ia ka roi ka par kaba kynthup lang ia baroh ha ka thain. U la pynpaw ruh ka jingkyrmen ba kane ka Executive Committee kaba thymmai kan trei da ka jingaiti lut ban weng ïa ki jingangnud jong ki paidbah bad ban pynneh pynsah ïa ki jinglong tynrai jong ka Riti Synshar ba la buh ha ka Sixth Schedule.
U Lat u la pynpaw ruh ïa ki jingsngewkhia halor ka jingdonkam ban pynneh pynsah kham khlaiñ ïa ki marpoh khyndew bad ïa ki jingthaw ba im ha ka thaiñ Khasi Hills.
U la pynpaw ia ka jingdonkam kyrkieh ban pynneh pynsah ia ka jinglong ryntih jong ka mariang katba dang bud ia ki thong pynroi bad pyntip sha ki dkhot kiba wan jngoh ba yn sdang ia ki jingialang ba la thmu ba iadei ban weng ia kine ki jingeh ha ka mariang ha ka rukom kaba bniah bad kaba iadei.
U la pynksan ia ka jingpynroi ia ka dawai Ayurvedic, ka jingrep ia u sohjew, bad ka jingpynkhlain ia ki rukom ri ngap ha ka thain.
Na ka liang ka Executive ka la pyntip sha u Lat ka jylla shaphang ki jingeh ba ka thaiñ Khasi Hills ka ïakynduh bad ki la pan jingkyrshan pisa ban kyntiew ïa ki kam pynroi, khamtam eh na ka bynta ban pynneh pynsah ïa ka Shnong Khasi Heritage ha Mawphlang bad ka jingsumar bad jingpynneh pynsah ïa ki riti dustur bad ki jingtei baroh kawei.
U Khlieh Nongsynshar u la ai khublei ïa u Lat halor ka jingïalam jong u bad pynthikna ïa ka jingïatreilang kaba pura ha kaba trei na ka bynta ka bha ka miat jong ki paidbah ka thaiñ Khasi Hills.