Shillong, 14 Risaw (Oct 14):
Ka kynhun jong ka Joint Action Committee of Border na West Jaiñtia Hills District ryngkat bad u Waheh Shnong ka Lapangap, u Bah Deimonmi Lyngdoh, ki la leit ban ia kynduh ia u Myntri Rangbah ka Jylla, u Conrad K. Sangma, bad ia u Symbud Myntri Rangbah, u Ma Sniawbhalang Dhar, ban iakren halor ka jingeh jong ki nongshong shnong ha ki thain khappud, khamtam kiba im na ka rep ka riang.
Hadien ka jingialang, u Waheh Shnong Deimonmi Lyngdoh u la iathuh ha ki lad pathai khubor ba u Myntri Rangbah u la kular ban shimkhia bad ban iakren ruh bad u Chief Executive Member jong ka Karbi Anglong Autonomous District Council, ban pynneh ia ka jingsuk bad jingiatylli hapdeng ki nongshong shnong jong ki ar jylla.
U ong, “U Myntri Rangbah u la ong ba un pyrshang katba lah ban iakren bad ki bor pyniaid jong ka Karbi Anglong ban pynneh ia ka jingsuk bad ban khang lad ia kino kino ki jingkulmar ba lah ban wan jia kumba la jia mynshwa.”
Ka JAC ka la pynpaw ruh ia ka jingsngewkhia halor ka jingtyrwa ban pynkhlaiñ ia ka jingdon ki bor pahara ha ki jaka khappud kum ka Shnong Lapangap, ha kaba ka la kyrpad ia ka sorkar ban:
. Phah ia ki pulit bad ki shipai pahara kiba biang ha kylleng ka shnong Lapangap, khamtam ha kane ka por synsar paddy.
. Pynlong ia ka jingpatrol man ka sngi ban iada na kino kino ki jingwan rung beain lane ki jingthombor na ka bynta jong ki nongshong shnong.
Pynshlur bad ai jingkyrmen ia ki nongshong shnong ba kin lah ban trei jingrep khlem jingartatien.
Ka JAC ka la kyrpad ruh ba ka sorkar kan pynkhlaiñ ia ka jingdon ki bor pahara da kaba ai ia ki tiar iada kum ki lathi, ki tiar pahara kiba kham kylliang, bad ki tiar pyniasaid jingsynshar kum ki wireless, kali patrolling bad kiwei ki tiar ba donkam. Kane ka long ban lah ban leh kham kloi lada don kino kino ki jingeh ha ki jaka khappud.
Ka jingdon ka bor pahara kaba khlain, ka ong, kan pynshlur ia ki paidbah bad kan pynjngai ruh ia ki jingkulmar bad jingialeh kti hapdeng ki paidbah jong ki ar jylla.
Ka kynhun ka la kyntu ruh ba ka sorkar kan pynshai halor ka jingpynmih ia Section 163 jong ka Bharatiya Nagarik Suraksha Sanhita (BNSS), da kaba ong ba lada ka dei ban trei kam ha thain khappud, ka dei ban ym ktah ia ka jingim bad jingtrei jingktah jong ki nongshong shnong, khamtam ha kane ka por synsar paddy.
Ka JAC ka la maham ruh ba lada ka sorkar ka khlem leh eiei ban iada ia ka hok jingim bad jingim jinglong nongrep jong ki paidbah ha thain khappud, ka sorkar hi ka dei ban shimti ia ka jingkitkhlieh halor kino kino ki jingjia kiba lah ban ktah ia ka jingim jong ki nongshong shnong Lapangap. Ka kynhun ka dawa ba lada don ki jingduh halor ka jingrep, ka sorkar ka dei ban ai jingpynsiew bad jingiarap kum ka bam, ka jingiarap jingim bad jingiarap rep sha ki paidbah ba shah ktah.
“Ka jingim jong ki nong Lapangap ka shong ki shong syier namar bym ioh leit ot kba ba pyndik ki paid karbi.. Lada ka sorkar ka khlem leh eiei ban iada ia ki, ka mut ka la duh jingim bad jingrep kaba ka pynim ia ki paidbah baroh u snem,” la ong u Waheh Shnong Deimonmi Lyngdoh.