Shillong, Iaiong 15 :Hato ka jylla ka donkam mo ia ka ILP kumba dawa ki seng bhalang katba ka sorkar pat kam pynshah la ki skhor.
U MP ka Rajya Sabha u Dr WR Kharlukhi u don ban ong kan long kaba shitom ban pynbor ia ka Sorkar Pdeng ba kan pyntreikam noh mardor ia ka Inner Line Permit (ILP).
U MP haba iathuh sha ki lad pathai khubor khlem ka jingdon bun ki nongmihkhmat ba khlain na ka thain Shatei Lam Mihngi, kan long kaba shitom ban pynbor ia ka Sorkar India.
.. Kumjuh ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri donkam ka jingiatreilang.
Haoid ka Iingdorbar Thaw Ain ka Jylla kala mynjur da kawei ka sur haba ia ka resolution ba iadei bad ka ILP bad ka ktien Khasi bad Garo bad na ka liang jong u, ula ju kren ia kine ki kam nalor kiwei ki MP na kiwei ki Jylla ha Parliament na ka por sha ka por.
Mynta um tip watlada u dei ruh na ka Seng NPP kum u MP u la tynruh shi tynruh hynrei ka Sorkar Pdeng kam ai satia. Ngi donkam ia ka jingdon bun ki nongmihkhmat ha Parliament kaba ngi la pyrshang kum ka NPP hynrei ngim ioh satia..ngi don ia ki MLA hynrei ym ki MP. Kan long kaba eh shibun katba ngim pat don ia ka sur kaba khlain” ula bynrap.
U Dr Kharlukhi ula ong “Em, ka Arunachal Pradesh, Nagaland kila ioh la slem bha. Ka Manipur kala ioh dang shen bad ka Sorkar India kala ong ba dei namar ba kim don ia ki District Council lane kumta hi bad kumta kala ai iaka ILP. Ka ILP dei naduh ka por ba synshar ka ri Bilat bad ha ka por ka Sorkar Bilat, ka ILP ka long ban iada ia ki briew ban wan na shabar sha ki jaka jong ngi hynrei mynta kala iapher, ka long ban iada ia ki riewlum”.
