ka Jaiñtia National Council (JNC) Western Zone ka la pynlong ïa ka jingjurip ïa ka surok Raliang – Sahsniang,

Mynta ka sngi, ka Jaiñtia National Council (JNC) Western Zone ka la pynlong ïa ka jingjurip ïa ka surok Raliang – Sahsniang, ha West Jaiñtia Hills District kaba jngai kumba 21 kilomitar kum shibynta jong ka skhim PMGSY-III.
Hadien ka jingmih khubor ha kaba iadei bad ka jingsniew jong katei ka surok, ka JNC Western Zone, hapoh ka jingialam u President Shri Hamehi Bamon, ka la lap ba tang 2 kilomitar ka surok, naduh Raliang sha Laskein, la dep pyntrei.
Katba ka council ka iaroh ia ka jingpyrshang jong ka sorkar ban kyntiew ia ka roi ka par, ki la pynpaw ia ka jingsngewkhia halor ka jinglong bym biang jong ki surok kiba dang shna thymmai, kiba la sniew noh tang hadien katto katne por ba la dep pyndep da uwei u kontraktor.
Ha kane ka jingleit jurip la lap ba wat ka blacktop ba don halor jong surok ka la jot lypa, ia kane ka donkam ban maramot mardor, kaba pyni ia ka rukom shna kaba khlem biang ,Ka JNC ka kyntu jur ia ka sorkar bad ia ka kompeni kaba don ka jingkitkhlieh ban leh kloi ia kine ki jingeh bad ban pynthikna ba ia ka surok yn shna haka rukom ba biang bad ba bha.
“Kane ka surok ka long kaba kongsan bha na ka bynta ka roi ka par jong ki shnong bad ki jaka ba marjan, bad ka jingtei kaba biang kan ai jingmyntoi shibun ia ki nongshong shnong” la ong ka JNC.
Ka council ka la pynksan ia ka jingkular jong ka ban buddien bha ia kane ka jinglong jingman ha ki por ban wan bad kan iasaid na ka bynta ka roi ka par kaba neh ha ka thain.