Ka jaka ri khunswet jong ka Ri Bhoi Presbyterian Synod kaba don haka shnong Mawsyntai ha Ri Bhoi District ka dei kawei na ki jaka kiba la long ka jingkyrkhu iaki khun kynthei kiba ym shem la don ki nongri nonglum bad nongkyrshan.
Na ka jingiai bteng jong ka Ri Bhoi Presbyterian Synod ban kyrshan ia kane ka jaka ri khunswet kaba la tip kum ka Ri Bhoi Presbyterian Synod Children’s Home kaba long thik tang na ka bynta ki khynnah kynthei ka la long ka jingkyrkhu kaba khraw ia kiba la iohmad iaka jingpeit jingkhmih lyngba kane ka jaka ri khunswet.
Haka jingleit jngoh jong u Bah Mebanshem Snaitang uba dei u samla uba la ju mih bha shakhmat ban kyrshan ia kiba bun ki longing ka la pynlong iaki nongpeit nongkhmih ban pdiang sngewbha ia une u samla ryngkat bad ki jingiarap kiba u la noh synniang ha kane ka jaka ri khunswet, ha kane ka sngi na ka liang u Bah Mebanshem Snaitang u la noh synniang da ki kor Computer, ki miej buh computer bad ki duli ban buh iaki kot ki sla na ka bynta ban pyndonkam ha kane ka Children’s Home.
Haba kren hashwa ban aiti ia kine ki jingiarap u Bah Mebanshem Snaitang u la ong ba da ka jingkyrkhu jong u Blei iaki ka ki jam jong u, ka ju wan ka jingpyrsad mynsiem ban ai ka jingkyrshan sha kiba bun ki paidbah kat kiba u lah ban iarap ba kan long ka jingmyntoi para briew.
Nalor u Bah Mebanshem Snaitang ryngkat bad ki rangbah kiba la synranlang ia u ha kane ka sngi la donlang ka kong Darisha Malai kaba dei ka Superintendent ka RBP Synod Children’s Home Mawsyntai lem bad ki nongtrei ha kane ka Children’s Home ryngkat bad ki 9ngut ki khunswet kiba don ha kane ka jaka ri khunswet.
Haka jingiohlad ban shong iakren bad ban sngewthuh iaki jingiaid lynti jong kane ka Children’s Home u Bah Mebanshem Snaitang u la buh ruh iaka thong ban sa nangphah iaki jingiarap sha kane ka Children’s Home jong ka Ri Bhoi Presbyterian Synod Children’s Home kaba don ha Mawsyntai.