Shillong, 4 Nailar 2025 – U Symbud Myntri Rangbah ka Jylla, Bah Prestone Tynsong, u la leit jurip hi dalade sha ka jaka ba jia ka aksiden kaba sngewsih ha Rngaiñ, ha surok Shillong–Dawki, ha kaba haduh san ngut ki briew ki la duh ei ïa la ka jingim.
U Bah Tynsong haba kren sha ki lad pathai khubor u la ong, “Nga la bthah noh mardor ïa ka Sub-Division Civil ka Pynursla ban pynkhreh ïa ka detailed report halor kane ka jingjia. Ka SDO kan sa ai ïa ka kaiphod kaba bniah, bad katkum kata ngin sa leh ïa kaba donkam.”
U la pynpaw ruh ka jingsngewsih kaba khraw halor ka jingkhlad noh jong kine ki san ngut, kiba la kynthup ruh ïa u khynnah rit. U la iathuh ba kane ka jingjia ka dei kaba la jia ha ka por miet, bad ka lah ban dei namar ka jingkhapngiah lane ka jingkylla ka mariang.
“Nga la bthah ruh ïa ka NHIDCL bad ki nongtrei surok ba kin buh ïa ki signage ha ki jaka ba long khapngiah bad ba ap jingma. Kane ka dei ka sienjam ban tehlakam ïa ki jingjia ha ki por ban wan,” ong u Bah Tynsong.
U la ong ruh ba ka sorkar kan ap shuwa ïa ka report na ka SDO Civil Pynursla ban shim ïa ka rai halor ka jingai jingiarap ne ex-gratia sha ki longïing kiba la duh noh ïa la ki jong.