Nion U MLA ia ka Sorkar Jylla halor ka jingtwa kynroh Jingkieng Dwarksuid
Nongpoh 17 tarik
Naiwieng – Ka jingjia ba twa ki katto katne ki bynta jong ka jingkieng Dwarksuid ha Umroi, Shillong Bye Pass ka la wànrah ka jingeh ia ki paidbah nongiaid nongieng kiba ju pyndonkam ia katei ka surok. Na ka liang ki Bor pyniaid District ki la pynjari lyngba ka jingmaham pyrshah ba baroh ki kali kim dei ban iaid lyngba ka Jingkieng nar kaba don ha Dwarksuid ha surok (Shillong Bye-Pass) bad kaba hap ha shnong Umroi. Katei ka ain kaba la khang pyrshah ba ki kali kim bit ban iaid lyngba katei ka Jingkieng kan don ha ka jingma. Na ka liang u MLA ka Umroi u Bah Goerge B. Lyngdoh, MLA Umroi, uba la dep wan jngoh dalade u shem katei ka jingkieng ka la buh jingma ia ki paidbah. U Antor News uba la ioh ban iakren bad utei u Nongmihkhmat ka Umroi Konstituensi u iathuh ha ryngkat ki briew ka NHAI bad PWD, ki la dep wan khmih myn ha 14 tarik u Naiwieng ia ki bynta ba la twa jong katei ka jingkieng, khnang ban tip ba haduh katto ka la ktah ia katei ka jingkieng, kaba dei ruh kawei na ki jingkieng kaba donkam eh hapoh ka jylla bad kaba la pyniasoh wat sha kiwei ruh ki jylla. U MLA Umroi,u Bah George B. Lyngdoh, u la pynpaw ia ka jingdiaw ia ka Sorkar jylla ba Kam shim Khia ia ka jingtwa katei ka kynroh Jingkieng Dwarksuid. Ka dei kawei na ki jingkieng kaba donkam eh hapoh ka jylla bad halor ka jinglong jingman katei ka jingkieng, ka la pynshong syier ia ki paidbah iathuh u MLA Umroi. U Bah George Lyngdoh u kynnoh tyngeh ia ka Sorkar namar ka jingbymshimkhia naduh ki por kiba kham mynshwa, kat haduh ba ka la wanrah ia ka jingbym shngain ki paidbah ha ka leit ka wan.Haba batai halor katei ka jingkieng, u Bah George B. Lyngdoh, u la ong ba katei ka mat kam dei shuh kaba dang mynne mynta, hynrei ka dei kaba la 4 snem mynshwa bad kaba dei ruh kaba la ju mih ka jingdawa kaba man ka por sha ka sorkar jylla, ba ka dei ban shna noh da kawei ka jingkieng, khnang ba kan long shngain ha ka leit ka wan ki kali, Shuh shuh, utei u MLA Umroi, u la ong ba ka daw bad ka nongrim kaba la pynlong ia kiba bun ki jingkieng ba ki tor kloi hapoh ka jylla, ka dei namar ka jingiaid ki kali kiba la kit shaba palat u pud bad uba la kynthoh ruh, ba imat ba ki kali kiba iaid ha ki surok ha ka jylla, kim ju shah thew ia ka jingkhia.Nalor ka jingkieng Dwarksuid, sa ka jingkieng heh ka Damsite ruh ka la don hapdeng ka jingma, ha kaba wat ka Iingbishar badon burom ka Meghalaya High Court, ka la pynmih ia ka kyndon ba kino kino ki kali kiba la kit palat ia ka 10 ton, kim lah shuh ban iaid lyngba katei ka jingkieng, la bynrap u Bah George B. Lyngdoh.